Aasiannut pinngitsooratik tulaassuissapput
Aasianni suliffissuup ammaqqinnissaa siunertaralugu Naalakkersuisut immikkut ittumik piumasaqaatitalimmik, qaleralittassat 1.825 tonsit, Sigguk A/S-mut pisassiissutissatut tunniuppai, piumasaqaaterlu tassaavoq, qaleralittat tamakkiisumik Aasiannut suliffissuarmut tulaanneqarnissaat.
- Pisassiissutinik tunniussineq piumasaqaatinik sukaterinertaqarpoq, Sigguk A/S-imeersoq Frans Heilmann oqarpoq.
Namminersornerullutik Oqartussat ippassaq unnukkut aalajangerput qaleralittassanik pisassiinermi immikkut ittumik piumasaqaateqartoqassasoq, piumasaqaataavorlu qalerallit pisaasut tamarmik Aasianni suliffissuarmut tulaanneqartarnissaat,
Piumasaqaallu nutaaq naammassisinnaanerlugu, Sigguk A/S-ip sisamanngorpat tungaanut uppernarsiniarsarissavaa.
Aalisarnermut Naalakkersuisoq Finn Karlsen oqarpoq, aatsaat taamatut piumasaqaatitalimmik Naalakkersuisuni aalajangiisoqartoq.
- Aatsaat taamatut qaleralinnut tunngatillugu naalakkersuinikkut piumasaqaateqartoqarpoq. Qalerallit taamatut immikkut nutaamik pisassiissutigineqarnerinut atatillugu, pisassiissutissammi aalisartitseqatigiiffinnit amerlasuunit pilerngunneqarmata, aalisarnermut siunnersuisooqatigiit siunnersuutaat, tassa nunami suliffimmut sunniuteqartumik qaleralittassat sunniuteqarnissaat Naalakkersuisut malinniarsimavaat. Finn Karlsen oqarpoq nangillunilu: - Aasiannut tulaassuinissamut piumasaqaat Sigguk A/S-mit sisamanngorpamut naammassineqarsinnaanngippat, uanga Naalakkersuisunit tamanit pisinnaatinneqarpunga nutaamik aalajangiisinnaanissamik, qaleralittassallu piumasaqaatinut naammassinnissinnaasumut tunniussinnaavakka, Aalisarnermut Naalakkersuisoq Finn Karlsen oqarpoq.
Qaleralittassiinissaq nutaaq qaammatini arlalinni ingerlanneqarpoq. Qaleralittassiinissamut tunngatillugu Naalakkersuisut arriippallaamik aalajangerniarsimanerat, Aasianni borgmesterimit Enok Sandgreen-imit aammalu Inuit Ataqatigiit sinnerlugit inatsisartuni aalisarnermut ataatsimiisitaliameersumit Ane Hansenimit, naammagittaalliutigineqartarsimapput. Maannakkut aamma Ane Hansen Aasianni kommunalbestyrelsemi ilaasortaavoq.
