Aasianni Siumut Inatsisartunut sassartitsinianngilaq

Aasiammiut, qinersisoqalerpat illoqarfimminni Siumukkormiunik qinigassaqarnavianngitsut, siulittaasuata Arne Rafaelsenip nalunaarutigaa.

Inatsisartunut qinersisoqartussanngornera nalunaarutigineqarmalli Aasianni Siumut immikkoortortaqarfia marloriarluni ilaasortaminik iluatsinngitsumik ataatsimiisitseriartaraluarpoq. Ippassarlu aappassaanik ataatsimiisitseriaraluarnermi takkuttoqangaanngimmat, allatut ajornartumik siulersuisut taama aalajangiipput.

”Takkuttut siulersuisullu isumaqatigiippugut,

asuli nukinnik atueqqinniannginnatta Aasianninngaanneersumik Inatsisartunut qinigassanngortitsiniarata”, Aasianni Siumup immikkoortortaqarfiata siulittaasua Arne Rafaelsen taama oqarpoq. Taassuma sassartinneqarnissaa ilaasa siunnersuutigisimagaluarpaat, takkuttoqartanngereermalli qinigaanissi ilimaginngereeramiuk tunuartiinnartarsimavoq.

Arne Rafaelsen aperaarput, taama soqutiginnittoqarunnaariartornera sumik tunngaveqarsorineraa.

”Oqaatigiuminaappoq sunarpiaq pissutaanersoq”, oqarpoq.

Apereqqipparput, Siumut Aasiaat pullaariartulernersoq.

”Taama oqarsinnaanngilagut, tassami assigiinngitsutigut suliassatigut Siumut Aasiaat suleqataalluartarpoq. Unaana ippinnartoriinnaraa, Inatsisartuni qinersinissami aggersaanerigaluit taakku soqutigineqanngilluinnartutut immata”, Arne Rafaelsen oqarpoq.

Aasianni Siumumi ilaasortaasut inuit 30 missaanniikkaluartut Arne Rafaelsenip aamma oqaatigaa. Kommunemilu qinersinermi kingullermi inuit 300 missaanniittut Siumumut taasisimasutut nalunaarsorneqarsimasut.

Taamatuttaaq Arne Rafaelsenip erseqqissaatigaa, siornatigut assingusumik misigisaqarsimanatik.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat