Aasianni pisumi pinerluttoqarsimanngilaq
Polar Seafoodip Aasianni suliffissuani sulisup umiarsualivimmi ipinera ajunaarneruvoq. Politiit paasiniaanerisa timillu misissorneqarnerata tamanna ersersippaa.
- Takusinnaasagut malillugit ajunaarneruvoq peqquserlunnertaqanngitsoq. Angummi kingullermik takuneqarpoq marlunngornermi unnukkut nalunaaqutaq arfineq pingasunut, politikommisær Sebastian Bech tusagassiuutinut taama allappoq.
Aasianni politiit juulip 20-anni nalunaaqutaq ullaassakkut tallimanut nalunaafigineqarput umiarsualiviup eqqaani inummik ipisoqarsimasoq. Talittarfimmut qanittumi immami 3 meterisut ititigisumi.
AAMMA ATUARUK Polar Seafoodimi sulisoq ajunaartoq
Annaassiniartartunik ilaqarlutik politiit ornigutipallapput.
Tikiukkamik ingerlaannaq paasivaat angut inuusuttoq toqoreersimasoq. Ingerlaannaq pisoqarfiup eqqaaniittunik apersuisoqarpoq, ullullu ingerlanerani toqusoq misissorneqarluni.
- Suliffeqarfitsinni tamani sillimaniarneq pingaartinneqarluinnarpoq, taamaammallu - Aasianni fabrikkimi, Polar Seafoodimilu sulisuusugut tamatta tupaqqaqaagut - suleqaterput pikkorissoq taama alianartigisumik annaagatsigu, Henrik Leth oqarpoq.
Ilaqutaasut ilisimatinneqareersimapput.