Aasianni Nukissiorfiit sarfakilliortut

Aasiaat ippassaq unnuarlu nalunaaquttap akunnialuini sarfaaruteqqavoq. Aasiammiullu tamanna iluarinninngillat.
Allattoq Malu Pedersen
februaarip 20-at 2015 18:45

Gerda Lameksen Aasianni utoqqaat illuanni sulisoq iluarinninngittunut ilaavoq.

- Suliffitsinni aamma sunniuteqalaartorujuugami utoqqaat illuanni suligatta iggavimmi taamaammat qamittooraangatta pikkunalaarsinnaasarpoq.

Nalunaaquttap akunneri sisamat sinnerlugit Aasiaat ippassaq sarfaqanngilaq, Aasiannilu najugaqartut ilisimasimanngilaat suna pissutaanersoq aammalu qanoq sivisutigisumik sarfaqassannginnersoq. Juãna Petrussen Aasianni najugaqartoq erloqisimavoq suna pissutaanersoq aammalu sarfaarunneq qanoq sivisutigissanersoq nalugamiuk.

- Paaserusunnarsigami sunamitaavaana peqqutaasoq, qanoq naatsorsuuteqassaagut Nukissiorfiit tamanna aaqqinniarlugu aamma qanoq takorluugaqarpat, Juãna Petrussen taama oqarpoq.

Aasianni siunissami ataavartumik sarfaqarnissaa ulapputigaat 

- Ajuusaarpugut taamannak pisoqarmat.

Mogens Nielsen, Qeqertarsuup tunuani immikoortortap pisortaa taama oqarpoq, taassuma suleqataasalu Aasianni siunissami ataavartumik sarfaqarnissaa ulapputigaat.

Kisiannili Nukissiorfiit annertuumik eqqugaaqqasimasoq, taassuma oqaatigaa.

-  Generatorigut marluk ajortissimammata ippassaq sarfaarunnitsinnut peqqutaavoq, tassa imaappoq taakku marluk teknikkikkut ajutoorsimagamik naak pingajuat ajunngikkaluartoq.

Saniatigullu elværkitoqqami ruujorit qaarsimallutik. Taamaasillunilu generatoreq kisimi ataaseq ingerlalersimalluni.

Aatsaat sapaatip akunnerata tulliani aaqqiinissaartik Nukissiorfiit naatsorsuutigivaat.