Aasianni aalisakkeriviup ammarneqaqqinnissaanik naalakkersuisut ullumi aalajangertussaapput.
Aasianni aalisakkeriviup siorna novembarimi matuneratali kingorna innuttaasut 300-it suliffissaarupput, aalisakkeriviullu ammaqqinneqarnissaa Aasiaat kommuneannit maanna utaqqiinnarneqarpoq.
- Kommunip tungaanit massakkut annertunerusumik iliuuseqarsinnaanngilavut, neriuppugulli aalisakkeriviup ammaqqinnissaa naalakkersuisunit ullumi qinerneqarumaartoq, Enok Sandgreen, Aasianni borgmesteri, oqarpoq.
Aasianni aalisakkerivik siorna novembarimili matummat kommuni suliffeqanngikkallartunut katillugit koruuninik 9 millioninik aningaasartuuteqartariaqarsimavoq, kommunip aningaasaqarniarneranut assut eqquinerluttumik.
Aasianni suliffissuup ammaqqinnissaa siunertaralugu Royal Greenland 1.250 tonsinik qaleralittassanik siornali qinuvoq, suli akineqanngitsumik, tamannalu pillugu Inatsisartut aalisarnermut piniarnermullu ataatsimiititaliaanni siulittaasoq, IA-meersoq, Aasianneersorlu, Ane Hansen, naalakkersuisunut sapaatip akunnerata matuma siuliani sakkortuumik uparuaavoq. Tassalu tamanna ullumi tusaaneqarsimassanersoq paasinarsissaaq.