Aasianni maraton seqinerlu kaaviinnartoq

Arpattut aallartinneqassapput unnugu nalunaaqutaq qulingiluanut Aasiaat illoqarfiani arpallutik maraton-ertussat.

Pisarnertut peqataasussat ilaat ungasissumiit aggersuupput Nuummiit tunumiillu ilaat aggeramik. Aammattaaq umiatsianik illoqarfinnit nunaqarfinnillu Aasiaat qanitaaneersut aggianiarput arpagiarlutik qiimmassaajartorlutillu aaqqissuisullu nalunaarutigaat arpaqataasussat 250-it missaanniittut.

- Naatsorsuutigaarput angutini siulliit unnuap qeqqata ataatsillu akornanni apuukkumaartut. Arnani siulliit ilimanarpoq marlup qeqqata missaani apuutissasut, Aasiaat Midnight Sun Marathon-imik aaqqissuisut komité-anni siulittaasoq Karen Dorthe Brandt KNRimut oqarpoq.

42 kilometerimut arpannermi arnani angutinilu ajugaasut 5.000 koruuninik pissarsiassaqarput. Normu 2-usut 3-usullu 3.000 koruuninik 2.000 koruuninillu pissarsiassaqarput.

Suli periarfissaqarpoq 42 kilometerimut, 21 kilometerimut, 10,5 kilometerimut aamma 4,2 kilometerimut peqataarusukkaanni suli periarfissaqarpoq nalunaarnissamut. ASP-p illuutaannut Ataarummut nalunaariartortoqarsinnaavoq nalunaaqutaq tallimaniit arfineq marlup tungaanut. Meeqqat inersimasullu peqataasinnaapput. Siorna arpannermi maratonimut arpaqataasut 20-it missaanniipput. Arpattullu kisimik aliikkusersorneqarnavianngillat.

- Arpannerup saniatigut silami Pavia Geisler tusarnaartitsiniarpoq. Arfininngornermilu unnukkut maratoneqataasimasut GU-p nerisarfiani naggataarnersiortinneqassapput, Karen Dorthe Brandt oqaluttuarpoq.

Siorna Frederik Petersen Ilulissaneersoq maratonimut ajugaasuuvoq atorsimallugit 3 tiimit minutsillu sisamat. Taanna ukiormanna peqataaqqissannguatsiarpoq. Mette Lynge Nuummeersoq siorna arnani ajugaavoq atorsimallugit 3 tiimit 44 minutsillu.

Aasianni maratoneqartarnerani sukkanersaasimavoq Lars Vindt 2007-imi ajugaangami 2 tiimit 48 minutsillu arpassimassimasoq.