Aasianni Inuit Ataqatigiit ataatsimeersuassapput

apriilip 16-at 2005 15:51

Aasianni Inuit Ataqatigiit siulittaasorisimasaat Leo Rosing attaviitsunngortoq suli taartissarsineqanngilaq.

Leo Rosing sapaatip akunnerata matuma siuliani attaviittsunngorpoq Aasiannilu Atassut Siumullu suleqatigalugit kommunalbestyrelseimik ippassaq pilersitseqataalluni. IA-p ukiuni tulliuttuni sisamani kommunalbestyrelsemi sulinissaminut tunngavii naammaginagit, Leo Rosing Aasianni IA-mi siulittaasutut tunuarpoq.

Aasianni IA-mi siulittaasunngorallartoq Otto Sandgreen ilisimatitsivoq Aasianni IA maajip qulingani ataatsimeersuassasoq, Otto Sandgreen-illu ulluni kingullerni pisunik ilikkagaqarluarnerartup, siulittaasutut qinigassanngortissanerluni suli aalajangersimannginnerarpaa. Siulittaasussamut sassarusuttut maajip pingajuaatinnagu nalunaareersimassapput.

Enok Sandgreen IA-mit aamma anivoq, taassuma Leo Rosing peqatigalugu Atassut sinnerlugu qinigaasut pingasut Siumullu sinnerlugu qinigaasoq ataaseq suleqatigalugit amerlanerusuteqarlutik kommunalbestyrelsissamik maanna pilersitsipput, tassanilu Enok Sandgreen borgmesterissatut piukkuneqarpoq.

Aasianni Inuit Ataqatigiinnit borgmesterissatut piukkunneqartup Ane Hansen-ip pisut assut eqqumiiginerarpai, qinersinermini IA amerlanerussuteqaraluarmat. Ane Hansen neriuppoq Aasianni innuttaasut naammaginninnginnertik takutikkumaaraat.