Aasianni innuttaasut atsiortiterput
Aasianni innuttaasut 450-t missaat atsiorlutik aqquserngit aserfallassimanerujussuat naammagittaalliutigaat. Atsiortitsinermi siuttuusoq, Jack Nathansen, aperaarput, Aasianni aqqusinilunneq innuttaasunut qanoq ajoqutaatiginersoq.
- Tassa biilertunut, inuinnarnullu pisuinnartunut aamma cykkilertunut aqqusinilunnerput ajoqutaangaatsiarpoq, aqquserngit putoqarnerujussuat pissutigalugu, biilit aserfatsaalinerannut aningaasarpaaluit atortaratsigik, namminerlu taamaaliorumanngikkaluarluta putut aqqisinerniittut nalaaraangatsigik inuit aamma seqertoortarpavut, Jack Nathansen oqarpoq.
Taanna nangilluni oqaluttuarpoq, Aasianni innuttaasut biilillit ilaat aqqusinilunneq peqqutaalluni ukiumut 20.000 koruunit missaannik aningaasartuuteqartariaqartarsimasut.
Jack Nathansen aperaarput, Aasianni aqquserngit suliarineqartarnerat qanoq innersoq?
- Siornatigut tassa maluginiartarpara ukiassakkut, sila nillertereersoq, suliarinialuttaraat, uanga takusinnaasakka najoqqutaralugit ajorpoq, asfaltimi iluamik nippunneq ajorpoq, taamaattumik sivikitsuararsuarmik atariarlutik taakku ilaartugaat makeqqittarput. Ukiut kingulliit aamma maluginiarpara, mangiaanersuaq, bulldozerit, makku gummikædinik taasartagaat, taakku pissutigalugit aqquserngit malunnartorujussuarmik ajortittorujuusimapput.
Aasianni biilit 200-t missaanniipput, atsiornernillu katersisut aamma naatsorsuisimapput.
- Naatsorsuutigisakka najoqqutaralugit Aasianni biilit 200-t missaanniipput, aningaasallu ukiumut akiliutigisartakkavut, 1,2 -2,2 millioni koruunit missaanniittut Namminersornerullutik Oqartussani akileraartarnermut pisortaqarfimmut tuttarput, taakkulu aqquserngit aserfallatsaalinissaannut atorneqarsinnaasutut takorlooraluarparput, Aasianni innuttaasoq Jack Nathansen oqarpoq. Taanna oqarpoq, Aasiaat kommunea neriorsuisimasoq, aqquserngit, aningaasaqarnertik najoqqutaralugu, annikitsunnguakkaarlugit iluarsaanneqarumaartut.
