Aasianni inissiat nillertut
Nalunnguarfimmi najugallip, kiassaateqarfimmit ataatsimit pilersorneqartut ilaanneersup, ajornartorsiut kiassaateqarfimmeersoraa.
Saffiuup soraarnerup, Adam Møller Brobergip nuliani ernertillu Nalunnguarfimmi najugaqatigai. Najugaqarfiallu issileraangat qiianartorujussuanngortarpoq:
- Tassa ukiut pingajussaanik 15-it qaangerlugillu issilertorlu tassa qiianarsisarpugut imermillu kiattuerulluta. Taavalu kiassaatit uunarunnaartarlutik illup ilua nillasuttuinnavinngortarluni, Adam Møller Broberg oqarpoq.
Ilaqutariillumi imermik kissartumik atuiniaraangamik qangatut iliortariaqartarput:
- Taavalu erruiniaruttaluunniit suniaruttaluunniit imermik qalatitseqqaarluta pisariaqartarpugut. Taavalu uffarsinnaannginnatta qangatut qalatitseriarluta asattortarpugut, Adam Møller Broberg oqarpoq.
Adam Møller Broberg isumaqarpoq kiassaatit kissassinnaannginnarat imermillu uunartueruttarnera kiassaateqarfimmit pilersuinerlunnermik aallaaveqartoq:
- Eqqaamasakka malillugit makkua inissiat sanaartorneqaqqaarmata kiassarnermut ruujorii 3 tommiupput. Ukuami tunioragai annertujaaramik. Taavali ukiut sisamangajaat matuma siornatigut taarsersornikuuaat takusinnaasakka malillugit ruujoritai 1½ tomminngorlugit, Adam Møller Broberg oqarpoq.
A/S Inissiaatileqatigiiffik INI-miilli ajornartorsiut sapaatip akunneri pingasut matuma siornali aaqqinniarneqarsimalertoq ilisimatitsissutigineqarpoq.
Inissiaatileqatigiiffik kiassarnermut pumpemik sakkortunerusumik ruujorilerisunut ikkusseqqusilluni suliakkiutigineqarsimavoq.
Ilanngullugu inissiaatileqatigiiffiup maanna misissuleruttornerarpaa kiassaatinik kallerup inneranoortunik najugaqartut tunineqarsinnaanersut, tamatumalu kingorna kallerup inneranut atuinerunermut aaqqiivigineqarsinnaanerat.
A/S Inissiaatileqatigiiffik INI-mit aamma kaammattuutigineqarpoq najugaqartut imermik kissartumik ajornartorsiuteqarunik INI-mut saaffiginnittarnissaat, imermik kissartumik pilersuisut misissorneqarniassammata.
