Aasianni inissianik attartortut suli qiiapput

Aasiaat ilaani najugaqartut issileruttornerata nalaani init qiianarpallaarneri pillugit naammagittaalliortut 53-it ilaannaat sisamat aaqqiivigineqarput iluaqutaanngitsumilli.
apriilip 02-at 2012 13:10

Ineqarnermut Naalakkersusioq, Jens B. Frederiksen sapaatip akunneri marluk matuma siorna aalajangerpoq, ineqarfiit qiianarpallaarneri pillugit aaqqiigasuarnissaq siunertaralugu Aasiannut takusaatitsiniarluni.

Init qiianarpallaarneri pillugit naammagittaalliortut aaqqiivigineqartullu ilaat suli qiiapput. Maanna qaammatip sisamassaat aallartippoq, Miki Jensen-ikkut inaat suli qiianarluni aammalu naammattumik imermik kissartumik pisinnaanatik.

Inissiaatileqatigiiffik A/S INI-p Aasianni immikkortortaqarfiannit viceværtinit marlunnit, Miki Jensen-ikkut inaat, sapaatip akunnera kingulleq ussissarneqaraluarpoq, iluaqutaanngitsumilli.

- Ussissarneqarneri iluarinanngillat. Uanga nammineerlunga isumaqarpunga illup timitaa aatsaat ussissarneqarpat, ajornartorsiut qaangiutissasoq. Vicwværtip marluk takkukkamik inerput skummimik ruujorinut ussisaatinik naterput kiilerimiit ussissaraluarpaat, iluaqutaananilu, Miki Jensen taama oqarpoq.

Miki Jensen 2009-mi septembarimi ilaquttanilu maanna inigisaminnut nutserput, tassalu taamanili issilersillugu inigisartik kiassaruminaatsoq paasivaat, tamannalu naammagittaalliutigisarlugu.

Miki Jensen-ikkut decembarimi naammagittaallioqqipput, tassalu maanna qaammatit sisamassaat aallartippoq, suli iluamik inaat kiassarneqarsinnaanani.

Aasianni illoqarfiup ilaani, Nalunnguarfimmi, Aqqullummi Wille Brandtsvej-illu ilaani ineqartut 53-it atsioqatigiillutik naammagittaalliorlutik, Inissiaatileqatigiiffiup A/S INI-p Aasianni immikkoortortaqarfiannut iluarseeqqusipput, taakkulumi takkupput aaqqiissuteqaraluarlutillu, inissialli sisamaannaat iluarsiivigineqarlutik.

- Maluginiarpara uangut naammagittaalliortut kisitta aaqqiivigineqarnerput, allallu atsioqataasut aaqiivigineqaratik, maluginiarparalu naammagittaallioqativut nukissaqarpallaanngitsut inaat iluarseriarneqanngimmata, Mike Jensen oqarpoq.

Taanna aamma oqarpoq, imeq kissartoq suli ajornartorsiutaasoq, oqaatigalugu imeq kissartoq 5 minuttit missaanni kuutsikkaanni nillerteqqittartoq.

Taanna aamma oqarpoq, imeq kissartoq suli ajornartorsiutaasoq, oqaatigalugu imeq kissartoq 5 minuttit missaanni kuutsikkaanni nillerteqqittartoq.

Inissiaatileqatigiiffik A/S INI sapaatit akunneri marluk matuma siorna nalunaarpoq, Aasianni init massakkut qanoq iluuseqarfigisinnaanagit, aningaasassaaleqineq tamatumunnga pissutaasut oqaatigalugu. Tamatuma kingorna teknikerit marluk Asiannukartinneqarput, taakkulu maanna utereersimalerput nalunaarusiarlu Naalakkersuisunut tunniutereerlugu.

Inissiaatileqatigiiffik A/S INI-mit tamanna pillugu oqaaseqartitsisimasinnaanngilagut.