Borgmesteren regner med, at kommunen vil have brug for omkring 300 millioner kroner til boligbyggeri og renovering.Assi: Google Earth

Aasianni inissarsiortuni inuusuttorpassuusut

Aasianni inissarsiortutut allatsissimasut maanna 204-pput, taakku affaasa missaat 18-init 35-nut ukioqarput.

Aasianni inissarsiortut ukioq manna qaammatini siullerni pingasuni 70-inik amerlipput.

Aasianni inissarsiortut 204-pput. Inissarsiortunit 95-it inuusuttuupput 18-init 35-nut ukioqartut.

Naalakkersuisut Inatsisartunut ilaasortamut, Kristian Jermiassenimut (IA) taama paasissutissiipput.

Inissarsiortulli affangajaasa inuusuttuunerannut pissutissaqarluartoq, Kommune Qeqertalimmi borgmesteri, Ane Hansen (IA) naliliivoq.

Paragraf 37 naapertorlugu apeqqut suua?

* Kristian Jeremiassenip apeqqutai paragraf 37 naapertorlugu apeqqutaapput.

* Inatsisartuni ilaasortat naalakkersuisunut apeqquteqarsinnaapput. 

* Sammisanut sunulluunniit tunngasunik qaqugukkulluunniit apeqquteqartoqarsinnaavoq.

- Aasiaat ilinniartoqarfiugami soorlu ilinniakkaminnik maanaannaq unitsitsigaagamik inissarsiortunut ilannguttarput, borgmester oqarpoq.

Utoqqaat siulliusut

Inuusuttullu inissaaleqinerat pillugu ajornartorsiutaasoq erngertumik aaqqiivigineqanngitsoq, borgmesteri oqarpoq.

Kommune Namminersorlutik Oqartussallu utoqqarnut pisinnaanerusunut innarluutilinnullu inissianik sanaartuleruttorput. Inissiallu taakku naammassineqarpata inissiat inueruttut inuusuttut initaarisinnaavaat, Ane Hansen oqarpoq.

- Tassa piffissami qanittumi inissiat arlallit inueruttussatut naatsorsuutigaagut, pissutigalugu utoqqarnummi pisinnaanerusunut inissiat naammassiliivittut qimatassaat periarfissanngortussaapput allanik inuttalersorneqarnissaannik, Ane Hansen KNR-imut oqarpoq.

Taassuma kommunip sanaartornermut nutarterinermullu 300 millionit koruunit missaanniittut pisariaqartikkai naatsorsuutigaa.

Aasianni inissarsiorneq marsip 31-anni agguaqatigiissillugu qaammatinik aqqanilinnik sivisussuseqartarpoq.

Inuusuttunut inissiaqalilersoq - Aasianniunngitsorli

Taamaammat Aasianni inuusuttunut inissiaqalilinngilaq.

Kisianni nunatsinni sumiiffinni allani inuusuttunut inissiaqarpoq. Upernavimmi inuusuttunut inissiaqarfiit sisamat 2024-mi decembarimi iserterfigineqarsinnaalissapput. Qasigiannguani inuusuttunut inissiaqarfiit sisamat 2024-mi novembarimi iserterfigineqarsinnaalissapput Tasiilamilu inuusuttunut inissiaqarfiit arfineq pingasut 2024-mi februaarimi iserterfigineqarsinnaalissapput.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl