Aasianni IA-kkut siulersuisortaarput

Aasianni Inuit Ataqatigiit siulersuisortaarput. Siulittaasunngorpoq inatsisartuni siulittaasuusimasoq Ole Lynge. Taanna siornatigut Aasianni IA-p immikkoortortaani aamma siulittaasuusimavoq.

Kommunalbestyrelsimut qinigassanngortinngikkaluarluni IA-p immikkut ataatsimeersuarnerani kaammattorneqarnermigut siulittaasussatut sassarpoq – qinigaallunilu.

Ukiuni kingullerni pingasuni Ole Lynge politikkimit tunuarsimaarsimagaluarpoq.

- Aasianni IA tunuliaqutaralugu kommunalbestyrelsimut qinigaasut sutigut tamatigut sullinnissaat piareersimaffigaara, Ole Lynge radioaviisimut ullumi oqarpoq.

Aasianni IA-p siulittaasorisimasaa Leo Rosing kommunalbestyrelsimut qinersereernerup kingorna tunuarpoq, partii IA-p ukiuni tulliuttuni sulissutigiumasaat iluarinanngitsuunerarlugit.

Aasianni Inuit Ataqatigiinni siulittaasup tulliattut inissippoq Inuaraq Petersen.