Aasianni GU-mi imigassaq naaggaarluinnarpaat

Tamannalu allanngortinniarlugu ilinniartut unnugu akerliussutsimik takutitsissapput.

- Akerliunerput takutsikkusupparput GU-p kollegianinngaanniit anisitsisarnermut politikki pillugu, angunianngilarput imigassap kolligiani ammaanneqarnissaa. Kisianni anguniarparput anisitaatigata mianersoqqussummik tunineqarsinnaanissarput, Nicki Olsen Avannaani Ilinniarnertuunngorniarfimmi ilinniartoq taama oqarpoq.

Ukioq atuarfiusoq aggustimi aallartimmalli ilinniartut arfinillit imigassaateqarsimanermik tunngaveqartumik kolligeani iniminniit anisitaasimapput. Anisitaasut ilaat Aasianni ilaqutaqannginnamik ilinniarnermusiallillu akilersinnaasaannik inissaqannginnamik atuarnerminnik unitsitisariaqartarsimapput.

- Maani Aasianni ilaqutaqarani, immaqaluunniit maannga illoqarfimmut tikiinnaavilluni anisitaariataagaanni taava sumut saaffiginnittoqarsinnaagami? Sapaatillu akunnera kisiat periarfissaralugu. Taava taakkua pinaveersaartinniarlugit taanna anguniagarivarput atuartut amerlasuut uniinnannginnissaat sumiiffissaarutinnginnissaallu anguniarlugu, Aaqa Dorthe Olsen Avannaani ilinniartuunngorniarfimmi ilinniartoq taama oqarpoq.

Kollegiani najugaqartut 18-nileereersimagaluaarangamilluunniit inigisaminni imigassaateqarsimagaangamik anisitaasarput, inigisamik qimavinnissaanut sapaatip akunnera ataaseq periarfissinneqarlutik.

Ilinniartut akerliussutsimik takutitsinerminni anguniakkaminnik angusaqarusupput, tamannalu iluatsinngippat Inatsisartut oqartussallu aqqutigalugit inatsimmik allanngortitsinissamut aqqutissarsiorniarput.

- Iserfigisinnaasagut, aqqutigisinnaasagut tamaasa sakkuginiassarissavagut, Aaqa Dorthe Olsen Avannaani ilinniarnertuunngorniarfimmi ilinniartoq taama oqarpoq.

Akerliussutsimik takutitsineq Aasianni GU-p atuarfiani unnugu qulingiuluaniit pissaaq. Ilinniartut ilinniartitsisunik qaaqqusisimapput, taakkulu oqalugiarfigineqassapput. Ilinniartut akerliussutsimik takutitsinerminnut atatsillugu atuarfimmi unnugu sininniarput. Ilinniartullu atuarfimmi sininnermikkut takutikkusuppaat, ilinniartut anisitaasut toqqissillutik siniffissaqannginnermikkut ilinniakkaminnik naammassinnisinnaannginnerat.