Aasianni eqqaavissuaq ikuallarujussuartoq
Aasianni Qatserisartut pingasunngornermi ullaap tungani nalunaaqutaq qulit qaangilaarnerani ikuallattumut tikiupput, nalunaaquttallu akunneri aqqaneq marluk missaanni ikuallattoq qaminniarlugu qatserillutik.
- Ikuallanneq aallartimmalli pujoq qernertoq annertoorlu illoqarfimmut pujoorsimagaluarpat inuttaasut nalunaarfigisimassagaluarpagut. Ikuallannerup nalaani anori illoqarfiup tungaanut anorlersimanngilaq, tamannalu qujanartumik illoqarfimmiunut malunniussimanngilaq, Gerhard Petersen Qaasuitsup kommuneani Aasianni ingerlatsinermi akisussaasoq KNR-imut oqarpoq.
Unnukut anori illoqarfiup tungaanut saqippoq, pujorlu qernertuinnaq tipittorlu illoqarfimmi naamananeqarsinnaallunilu takuneqarsinnaavoq. Taannali tipi pujorlu qatserisartut innermik qamitsiniarneranni erngup qamitsiniutaasup aalarigaa, Gerhard Johansenip nassujaatigaa.
Eqqaavissuup ungasinngisaani eqqakkanik ikuallaavimmi sulisut isumaqarput, eqqaavissuarmut igitsitsiartortut ilaata cigaretsimik igitsinerani ikuallanneq aallartissimasissasoq.
Tamannali qulakkeerlugu oqaatigineqarsinnaanngitsoq, Qaasuitsup kommuniani Aasianni ingerlatsinermut akisussaasup Gerhard Johansenip oqaatigaa.
Eqqaavissuarmi wirer-it savimerngillu kissannerat pissutigalugu qatserisartut imeq qatserutigisaat ingerlaannaq aalannguuttarsimasoq qatserisartut ittuat David Løvstrøm oqarpoq. Taamaammat eqqaavissuup ikuallarujussuarnera sivisuumik qaminniarneqarsimavoq.
David Løvstrømip suliffeqarfiit eqqakkanik ikuallaasartut kajumissaarpai mianersortassasut innerup siaruaappallaarnissaa pinngitsoorniarlugu.