Aasianni containerit qerititsiviusut aserorteriffigineqartut
- Taamaliortoqarnera soorunami inerteqqutaaginnarani containerit arlariit imarisaat annaaneqarpata najukkami innuttaasunut tamanna akisuupilussuanngorsinnaavoq, Aasianni politeeqarfimmi politikommissæriugallartoq, Arne Sandgreen Reimer, taama oqarpoq.
Taamaammat marlunngornerup unnuaani pasinarsinnaasunik takkunnissimasunik imaluunniit aserorterisimasut kikkuunerinik ilisimannittunik Aasianni politiit ikioqqupput.
Aasianni talittarfiup meeqqanit inuusuttunillu piffissami kingullermi unnuakkut uninngaarfigineqartalersimanera politiit maluginiarsimavaat.
Meeqqat inuusuttullu unnuakkut talittarfimmiittartut
Taamaammat inuusuttut angajoqqaavi politiinit kaammattorneqarput meeqqaminnik nakkutiginnilluaqqullugit, meeqqanillu unnuaanera naapitaqassugunik inunnik isumaginnittoqarfimmut tamatuminnga kalerriuteqartassallutik politiit aamma oqaatigaat.
Meeqqat 15-it inorlugit ukiullit pinerluttulerinermi inatsit naapertorlugu pillarneqarsinnaanngillat, angajoqqaalli taarsiissuteqarnissamik piumasaqaateqarfigineqarsinnaapput.
Aasianni talittarfimmi aserorterisoqarsimanera pillugu, politiit oqarasuaatikkut 70 14 24-kkut attavigineqarsinnaapput.