Aasianni kina borgmestrinngussanersoq aamma aalajangerneqarpoq.
Aasianni IA-p siulittaasua Leo Rosing tusagassiutinut allappoq, Aasianni IA-p aalajangeraa ukiuni tulliuttuni sisamani Ane Hansen Aasianni borgmesterinngussasoq.
Ane Hansen inatsisartuni IA sinnerlugu ilaasortaasoq inatsisartuniit tunuarniarluni raatiuaviisimut oqarpoq.
2001-mi qinersinermi Aasianni Atassut sinnerlugu qinigaalluni borgmesterinngorsimasoq Knud Sørensen qinersinermi kingullermi qinigassanngorteqqinngilaq, ukioq mannalu kommunemut qinersinermi Inuit Ataqatigiit Aasianni aajugaarujussuarput, kommunalbestyrelsemi inissani aqqaniliusuni issiaviit arfineq-marluk IA-p tigummagit, taamaalilluni kommunalbestyrelsemi amerlanerussuteqalerluni Aasiat kommuneani siuttungorluni.