Aasiammiut quarsaaqqapput
Tamatumani angut 51-inik ukiulik ukiukitsunik kinguaassiutitigut atornerluisarsimasoq paasineqarpoq. Angut meeqqanik nukappiaraanerusunik katillugit 17-inik amerlatigisunik atornerluisarsimasutut unnerluunneqarpoq.
Angutip 51-inik ukiullip meeqqanik atornerluisarsimanera Ilaqutariinnut kiffartuussivimmi paasineqaqqaarpoq. Aasianni ilaqutariinnut kiffartuussivimmi ningiuugallartup, Ane Marie Henriksenip, nipangiussisussaanini tunngavigalugu oqaaseqaqqusaannginnerarpoq. Aasiaat Kommuneani Inunnik Isumaginnernermut immikkoortortaqarfimmi pisortaq, Kristine Reimer, aamma oqaaseqarsinnaannginnerarpoq.
Meeqqanik kinguaassiutitigut atornerluinermik Aasianni perngaammik nalaataqalinngillat. 1996-imi angut 50-it tungaanut ukiulik meeqqanik inuusuttuaqqanillu 40-t tungaanut amerlassusilinnik kinguaassiutitigut atornerluisarsimasutut paasineqarpoq. Taamani meeqqat atornerlunneqarsimasut ikiorserniarlugit suliniutit assigiinngitsut aallartinneqarput. Suliniutigineqartarsimasut kinguneri pillugit ullumikkut oqaaseqartoqarumanngilaq, aammali massakkut pisumi misissuinerit suli naammassinngimmata politiit tungaanniit oqaaseqartoqarsinnaanngikkallarluni. Borgmester Enok Sandgreen oqaaseqartinniaraluaratsigu iluatsinngitsoorparput.
