Aasiammiut Qaasuitsup Kommunia suli avikkusuppaat
- Tassa demokratii illersorniarlugu ilaatigut aamma aallartittoqarpoq. Ilaatigut uani aalajangiinerit atuisut qulaatiinnarlugit pisalermata. Soorunalimi politikerit aalajangiisussaapput, kisianni tusarniaanerit allallu ingerlanneqanngiivillutik pisarput. Taamaalillutik innuttaasut misigisimalernikuupput peqataanatik, Peter Frederik Gedionsen, Suliniaqatigiiffik Aasiaat Pillugumeersoq oqarpoq.
Taamaattumik suliniaqatigiiffimmit, siorna junimi pilersinneqartumit, isumaqartoqarpoq Qaasuitsup Kommunia marlunngorlugu avinneqartariaqartoq. Tassa Diskobugti avannaalu immikkut kommuniusariaqaraluartut:
- Qaasuitsup Kommuneata avannaa kujasinnerusualu assigiinngitsunik inuussutissarsiuteqarfiuvoq. Avannaani aalisarneq inuussutissarsiutaanerulluni maanilu kujasinnerusumi taamaattoqarani, Ejnar Østergaard Madsen Suliniaqatigiiffik Aasiaat Pillugumeersoq oqarpoq.
Suliniaqatigiiffimmiillumi pisortanut attaveqartarnerit pisariunerulersimaneri piffissartornarnerulersimanerilu qatsulluinnarneqarput:
- Tassa soorlu nunaminertanik qinnuteqarniaraanni piffissarujussuaq atorneqartarpoq, ilaatigut aqqutip takivallaarnera pissutigalugu. Sunaluunniit saaffiginnissut piniaraanni aqquteerarpassuit, inuit arlallit aqqusaaqqaarlugit, aatsaat pisalernikuuvoq. Pisariaqanngitsumik, Peter Frederik Gedionsen oqarpoq.
Taanna isumaqarpoq suliffeqarfiit kommuunip ataaniittut namminersorlutik ingerlanneqaraluarunik pilertornerusumik akuersinerit akuersinnginnerillu ingerlanneqarsinnaangaluartut.
Qinersisartorli alla Qasigiannguaneersoq isumaqarpoq naammagittaqqaalaartariaqartugut. Lars Johansen ima allappoq:
- Politikkerigut pikkorinnerusariaqarput aporfiit takkuttut suleriarfiginissaannut. Atagu naammagittarnerulluta ingerlaqqeriarta, qinersivilluunniit naammatillugu.
Taava qineqqussaalerpata nalilersuissaqqaarpugut, pikkorinnerusunillu qinersilluta.
Taassuma qullersanik sulisussarsiortarnermi piukkunnarnerusunik kommuunit ujarlertarnissaat pisariaqartoq eqqaasitsissutigaa.
Suliniaqatigiiffik Aasiaat Pillugu, Qaasuitsup Kommunianut kommunalbestyrelsemut qinerseqqinnissamut tullermut qinigassanngortitsisinnaanerluni misissuileruttorpoq.
