Aasiaat unnuaani maratoni

Aasaanerani pisarnertut Aasianni maratoni aqagu tallimanngornermi unnukkut nalunaaqutaq qulingiluanut aallartissaaq. Ukioq manna kingumut Aasiaat unnuaani Maratonertoqarnissaani aamma arpalluni nunatsinni pissartanngorniuttoqassaaq. Aaqqissuisullu neriutigaat peqataasussat 250-it 300-nullu akornani amerlassuseqarsinnaanissaat. Maratonip saniatigut takissutsit assigiinngitsut arpaffiussapput, tassalu maratonip affa 21 km, 10 km kiisalu minimaratonimik taallugu 4,2 km.
Allattoq Peter Troelsen, Salome Hansen
juunip 28-at 2012 14:02

-Maani Aasianni taamatut aaqqissuinermi arnat angutinik peqataasunik amelanerusarput, ukioq mannali aamma taamaassanersoq suli oqaatigisinnaanngilara. Aqaguli -p illuutaani nalunaaqutaq tallimaniit arfineq marluk tungaanut peqataasussat allatsissimalereeriarpata tamanna takusinnaalerumaarparput, taamatullu peqataasussat qanoq amerlatigiumaarneri, Karen-Dorthe Brandt ASP-mit aaqqissueqataasoq taama oqarpoq.

Maratonertussanut arpaffissaq 10 kilometerit missaani takissuseqartoq sisamariarlugu kaajallanneqassaaq. Arpaffissaq illoqarfiup iluani mittarfiullu aqqutaani ingerlarfiussaaq, isiginnaartussallumi apuuffissami inissaqarluarput.

-Siullermeerluni Nuup  avataani arpalluni GM-imik aaqqissuusisoqarpoq, taamaattumillu sapingisarput tamaat atorlugu aaqqissusilluarniarpugut. Kiisalu aamma neriuutigilluinnarparput illoqarfimmi najugaqartut arpaffissani assigiinngitsuni peqataalluarumaartut. Maratonimi arpattussani angutini sukkanerpaaq unnuap qeqqa sioqqullugu apuutissasoq, arnanilu ataatsip qeqqata missaani apuussinnaassasoq ilimagereersinnaavarput, Karen-Dorthe Brandt oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq