Aasiaat: Tillinniat tigusarineqarput
Tillinniarnerup radioaviisimi ilanngunneqarneranit akunnerit arlaqanngitsut qaangiutiinnartut Aasianni innuttaasut ilaat paasissutissanik politiinut apuussipput. Taakku tunngavigalugit tillinniat marluk tigusarinqeqarput.
Ataasinngormat KNR.gl-mi aamma radioaviisimi ilanngutassiarineqarpoq Aasianni Sund Kioskimi tillinniartoqarsimanera. Tillinniat qassiunerat taamanikkut ilisimaneqanngilaq taakkulu aningaasat 20.000 koruunit missaat tillissimavaat.
- Radioaviisimi ilanngunneqareersoq innuttaasunit saaffigineqarpugut. Tillinniat marluk tigusarineqartut tillinniarsimanertik nassuerutigaat, Aasianni politeeqarfimmi ulluinnarni aqutsisoq Aqqaluk Petersen KNR-imut oqarpoq.
- Aningaasat 8.000 koruunit arsaarinnissutigaagut sinnerilu atoreersimavaat. Aningaasat saniatigut allanik tillitaqarsimanngillat, Aqqaluk Petersen oqarpoq.
Tillinniat 20-it sinnilaarlugit ukiullit iperagaaqqereerput.