Politiit angutit taakku marluk imaatigut qulimiguulimmillu ullaaq manna ujaaraat.Assi: Arkivfoto: Paarnaq Hansen / knr

Aasiaat Niaqornaarsullu akornanni ujarlerneq: Angutit marluk ajunngitsut nassaarineqarput

Politiit angutit marluk Aasiaat Niaqornaarsuillu akornanni imaatigut qulimiguulimmillu ullaaq manna ujaaraat. Ajunngitsut nassaarineqarput.

Angutit marluk, 37-nik 18-inillu ukiullit, Aasiaat Niaqornaarsuullu akornanni ujaarineqartut ajunngitsut nassaarineqarput.

Kalaallit Nunanni politiit KNR-imut tamanna uppernarsarpaat.

Politiit angutit taakku marluk imaatigut qulimiguulimmillu ullaaq manna ujaaraat. Taakku Aasianniit Niaqornaarsunnukarlutik ataasinngornermi januaarip qulingani aallarput.

Pingasunngornermi ullaassakkut suli apuutinngimmata politiinut nalunaarutigineqarput.

Angutit qeqertap Akulliit ungasinngisaani angallammik ujarleqataasumik pingasunngornermilu ulloqeqqa sioqqullugu nalunaaqutaq aqqanermut ajunngitsut nassaarineqarput.

Umiatsiaaraat kivisimavoq, angutillu ajoquseratik nunamukarput.

- Umiatsiaaqqamik qaleqanngitsumik angalasimapput, ikiortissarsiornissamut periarfissaqaratik. Ajornartoornermi annanniarniarnissaminnut imminnut periarfissakitsissimapput qujanartumilli ajornerusumik pisoqarani. Nassaarineqartut qujanaq ajornerusumimmi pisoqarsimasinnaammat, politikomissær Brian Thomsen tusagassiutinut nalunaarummi taama oqarpoq. 

Ujarleqataasut tamaasa qujaffigai.

- Aasiaat Radioat, qulimiguulimmik annaasiniaasartut, Kalaallit Nunaanni Politiit Issittumilu Sakkutooqarfimmit ujarlernermi pingaaruteqarluinnartut tamaasa  qutsavigaagut, Brian Thomsen oqarpoq, nangipporlu:

- Minnerunngitsumik inuit kajumissutsiminnik angutinik marlunnik ujarleqataasut. Angutinillu nassaarinnittut qujaffigaakka, Brian Thomsen oqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl