Aasiaat napparsimmaviat ikuallattoq

Ikuallanneq qatserisartunit qamisarneqartoq nakkutigineqalereersorlu politiit paasissutissiipput kisiannili napparsimavimmi sulisut uninngasullu qaqugu napparsimavimmut uteqqissinnaanerat oqaatigisinnaanngikkallarpaat.

Aasianni qitiusumik napparsimmaviup innaallagissiorfia ullumi ataatsip missaani ikuallalerpoq. Tamanna pissutigalugu napparsimmavimmi uninngaasut qimarngussorneqarput. 

Ikuallanneq qanoq annertutiginersoq manna tikillugu politiinit aamma napparsimmaveqarfimmit ilisimatitsissutigineqarsinnaanngilaq - uninngasut isumagineqarnerat ulapputigineqarmat.

-  Uippallertoqanngilaq napparsimmavimmi sulisut aamma qatserisartut  suleqatigiilluarput, qitiusumik napparsimmaviup eqqaani najugalik, Hans Ole Petrussen radioaviisimut taama oqarpoq. 

- Putsumik takusaqanngilagut kisianni qatserisartut atortutik maanna poortorpaat, Hans Ole Petrussen oqarpoq. 
Napparsimavimmi uninngasut sumut qimarngunneqarnersut aamma qanoq amerlatiginersut Aasianni politiit aamma napparsimavimmi sulisut suli nalunaarutigisinnaanngilaat, napparsimmavimmi uninngasut isumagineqarmata.