Aasiaat: Inuk ataaseq tunillatsittoq

Inuk ataaseq Aasianniittoq coronavirusimik tunillatsissimasoq ataasinngornermi decembarip ulluisa 28-anni paasineqarpoq. 

Taanna inunnut marlunnut aamma Aasianniittunut sapaatit akunnerata siuliani tunillatsissimasutut paasineqartunut qanigisaavoq.

Inuk Aasianniittoq suli ataaseq covid-19-imik napparsimalersimasoq peqqissutsimut naalakkersuisup Anna Wangenheimip (D) tusagassiortunik pingasunngormat katersortitsinermi nalunaarutigaa.

Pineqartoq tunillatsissimasunut allanut qanigisaavoq.

- Ajoraluartumik ullumikkut aamma paasivarput Aasianni tunillatsittumik ataatsimik ilasoqaqqissimavoq, Anna Wangenheim oqarpoq. 

Nunatta nakorsaanerata Henrik L. Hansenip oqarnera naapertorlugu pineqartoq ajunngilaq angerlarsimaannarsimallunilu.

Taassuma ilanngullugu oqaatigaa, tunillatsissimasutut pingasunngormat paasineqartoq, tunillatsissimasunut allanut qanigisaaneq pissutigalugu tunillatsissimasinnaasutut ilimagineqarsinnaasunut ilaasoq. Taamaammat Aasianni tunillaassuussinnaaneq suli killeqartorujussuartut naliliiffigineqartoq, nakorsaaneq oqarpoq.

Nunatsinni tunilltsissimasutut uppernarsarneqarsimasut maanna 28-upput. Taakkunani 19-it peqqissereerput, covid-19-ilu pissutigalugu napparsimmavinni unittoqarnikuunani.