Aasiaat eqqaanni qeqertaq uuliasiortut atorusuppaat

Misileraalluni qillerinerit aammalu immap naqqanik sajuppillatsitsisarluni misissuinerit angisoorujussuarnik atortunik atuiffiusarput tamakkulu Qaasuitsup Kommuniani umiarsualivioreersut tattulersimavaat. Taamaammat qeqertaq Tupilak uuliasiortut suliffeqarfiliorfissaattut kommuunip siunnersuutigaa.

Pilersaarutigineqarpoq uuliasiornermi Aasiaat pilersuivittut suli inerisarneqassasut. Ilaatigut pisariaqartinneqartussaavoq qeqertaq Tupilak tamakkiusavillugu taannalu 2 millioner kvadratmeterit sinnerlugit angissuseqarpoq. Sorsunnersuarmi kingullermi aamma Tupilak amerikamiut sakkutooqarfittut atorsimavaat.

- Inuussutissarsiornernut umiarsualivinnullu siunertanut nunaminertanik atugassiinissamik pisariaqartitsisoqarpoq. Taakku inuussutissarsiutini sanaartukkanik pilersitsinernik, ilioqqaavittut nunaminertanik, aamma talittarfiit allineqarnerinik imaluunniit nutaanik sanaartornernik periarfissiissapput, Qaasuitsup Kommunia tusarniaanermi saqqummiussamini allappoq tamakkulu kommuunip nittartagaanut ikkunneqarsimapput.

Inuussutissarsiornikkulli inerisaanerit Aasianni taamaallaat pissanngillat. Pilersuinernut tapertaasinnaasunik aamma sanaartortoqassaaq Qasigiannguani, Ilulissani, Qeqertarsuarmi, Qaarsuni aamma Upernavik Kujallermi.

Qaasuitsup Kommuniata aamma periarfissaatippaa mittarfeqarfinnik taakkunanilu illorsuarnik alliliinissaat. Siunnersuummut akerliunissamut oqaaseqarnissamulluuniit periarfissaq kingulleq tassaavoq januaarip tallimaat 2012.

Tusarniaanermi najoqqutassaq linki ataaniittoq toorlugu aasinnaavat.