Aasarsiutinik assakaasulernissat eqqaamallugu
Illoqarfinni anginerni politiit aqqusinermi biilit assakaasuinik misissueriataarsinnaanissaq oqaaseqarfigiumanngilaat. Ilulissanili maluginiarneqarput.
- Assakaasut ukiorsiutit suli atugaasut maluginiarpagut, annerusumilli iliuuseqarnissamik pilersaaruteqarnata. Sumiiffiit ilaanni, soorlu aqqusinerni sivingasuni suli assakaasut naqqullit pisariaqartinneqarput, Ilulissat politiivini pigaartuusoq, Flemming Lauritzsen KNR.gl´imut oqarpoq.
Vicepolitimester Helle Olesen KNR.gl´imut ilisimatitsivoq sinerissami politiit qanoq suleriarnissartik namminneq pilersaarusiortaraat. Erseqqissaatigaali assakaasut ukiorsiutit maajip aallaqqaataani peereersimanissaannut inatsit, inatsisaasoq avaqqunneqarsinnaanngitsoq.
Maannali inatsit allanngortinniarlugu suliniartoqarpoq. Inatsimmik allannguinerup kingunerissavaa politimesterip assakaasunik ukiorsiutinik atuisinnaanermut immikkut akuersissummik tunniussisinnaalernissaa.
- Ullumikkut nittaalluni silarlulissagaluarpat assakaasullu ukiorsiutit atuinnaraanni, tamanna inatsimmik unioqqutitsineruvoq. Taavali inatsit allanngussagaluarpat, assersuutigalugu Ilulissani assakaasut ukiorsiutit pisariaqartinneqarpata taava politimesteri akuersissummik tunniussisinnaalissaaq oqarluni ulluni 14´inik sivisunerusumik ukiorsiutinik atuisoqarsinnaasoq, politimesteri Bjørn Tegner Bay KNR.gl´imut oqarpoq.
