Aasarsiutinik assakaasulereerpit?

Maajip aallaqqaataa qaangiutereeraluartoq suli angumerisinnaavat aasarsiutinik biilivit assakaasulernissaannut. Angallannermini isumannaallisaaneq pingaarnerusoq politiit nalunaarutigaat.
Allattoq Noah Mølgaard, Medea Frederiksen
maajip 02-at 2011 13:14

Biilit assakaasui aasarsiutinik taarserneqassapput maajip aallaqqaataani nunatsinni aqqusinerni angallannermut malittarisassat malillugit. Taamaakkaluartorli sumiiffinni arlalinni aqquserngit aputeqarlutillu sermertarput. Taamaammat malittarisassaq taanna politiit sukannersumik malinngilaat.

Kujataa aasajaarnerusarpoq. Taamaammat taqqavani politiit biilit assakaasui misissullattaanialereerpaat, aasarsiutinillu assakaasulersimanngikkaanni akiliisitaasoqarsinnaavoq.

Avannarpasinnerusumili suli aputeqarlunilu sermilinnik aqqusinilinnni politiit aasarsiutinik suli assakaasulersimanngitsut takunngitsuusaaginnarallarpaat.

- Aqqusinerni isumannaatsumik angallannissaq pingaarneruvoq. Suli ullaakkut aqqusinerni aputeqarlunilu sermeqartarpoq. Taamaattumik suli misissuiffigilinngilarput biilit aasarsiutinik assakaasulersorsimanersut. Kisianni ilimanarpoq ullut tallimat qulit qaangiuppata misissuisalernissarput,Nuummi politiit taama KNRimut ilisimatitsipput.

Taamatuttaaq nalunaarput politeeqarfiit suli avannarpasinnerusumiittut taavanimi suli aqquserngit arlalissuit apummik qallersimapput. Isumannaatsumik angallannissaq pingaartinneqarneruvoq. Taamaattorli ukiorsiutinik assakaasoqarnissaq pisariaqarsorineeruppat avannaani politiit biilit assakaasui taarsersimanersut misissullattaalerniarpaat. Assakaasut kikiaasanik naqqullit aasami inerteqqutaasarput asfaltimik nungullarsaataanerusaramik.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq