Aasaq Qaqortumut alakkaamavoq
Arfininngornermi majip tallimaani Qaqortumi kiassuup ataani puilasup eqqaani innuttaasut katerisimaarput. Qaqortumi sisorartartut arpattartullu peqatigiiffiat QSAP katerisimaartitsinermi aaqqissuisuuvoq.
Allattoq Mads Pedersen
maajip 05-at 2012 18:00
Qaqortumi silageqaaq, innuttaasullu aasarsiorpalaalereersimallutik. Innuttaasut puilasup eqqaani katersuupput, tassanilu grillerisoqarlunilu assigiinngitsunik tuniniaasoqarpoq. Innutaasut nuannisaqaat, sumi tamaani meeqqat pinnguarlutik arpaqattaartut takussaapput, inuillu oqallillutillu illaqattaartut tusarsaallutik.
Takusassat ilagaat Qaqortumi kalattoortartut. Taakku alutorineqaqaat, tassami meeqqanit atualerlaaniit utoqqarnut kalattoortunik peqataasoqarmat.
Taamatut katerisimaartitsinermi innutaasut aggialluarnerat QSAP´mit nuannaarutigineqarpoq.
- Aaqqissuussinerput iluatsilluaqaaq, aamma silaginnermik inuppassuit aggiapput. Savanik grillikkanik sassaalliinerput iluatsilluaqaaq, Anguteeraq Olsen KNR.gl´mut oqarpoq.
