Aasaq naallugu Qanorooqartassaaq
Ukiorlumi manna siullermeerutaasumik Qanorooq aasaq naallugu ingerlaannassaaq. Tassa tv-kkut nutaarsiassat minutsini qulini sivisussuseqartarnissaat siunniupparput, tassa ippassakkut nutaarsiassat kingulliit aallakaateqqinneqarnerisa saniatigut nutaarsiassanik ilapittorlugit Qanorooq aallakaatinneqartassaaq, ullulli ilaani nutaarsiassaannavinnik minutsit qulit immerneqartarsinnaassallutik.
-Taamaalilluta ukioq kaajallallugu tv-kkut nutaarsiassanik inuiaqatigiit neqeroorfigisinnaassagatsigit tulluusimaarutigeqaarput, tusagassaqartitsivimmi pisortaq Mikkel Bjarnø Lund oqarpoq.
Aamma Radioaviisip aasarsiornissaa malunnaateqassaaq. Ataasinngornermi aallarnerfigalugu Kalaallisut qallunaatullu Radioaviisit unnukkut aallakaatinneqartarneri unitsinneqarallassapput.
-Aasami sulinngiffeqarnerup naligimmagu Radioaviisit naliginnaasut aallakaatinneqartarnissaannut sulisukippallaarpugut. Tassa aasaanerani sulisuvut ikittuinnaammata taakku artukkerumanagit taamatut aaqqiissuteqartariaqalersimavugut, tusagassaqartitsivimmi pisortaq oqarpoq.
Ulluinnarnili Radioaviisit, tassa nal. 7, 8 aamma 9 kiisalu nal. 12.15 aamma 12.30 naliginnarmik ingerlanneqartassapput, ullup qeqqanullu Radioaviisit unnukkut aallakaateqqiinnarneqartassallutik. Akunnerullumi naanerani Radioaviisit – tassa nal. 15 aamma 18.30 aamma 18.45 aallakaatinneqartartut pisarnermisut ingerlaannartarssapput. Tamatumali saniatigut unnukkut Radioaviisi toqqaannartumik aallakaatinneqarsinnaanissaa uagutsinnit piareersimaffigiuarneqarnissaa naatsorsuutigineqassaaq.
Aamma knr.gl aasaq naallugu pisarnermisut ingerlaannassaaq.
Tassa naatsumik oqaatigalugu: KNR-ip nutaarsiassaqartitsivia ullaamiit unnummut nutaarsiassaqartitsiviujuarnissaa aasaq naallugu naatsorsuutigineqarssaaq.
Qanorooq naliginnaasoq ataasinngornermi aggustip 19-iani aallarteqqissaaq, Radioaviisillu naliginnaasumik aallakaatinneqartarnera aggustip tallimaani aallarteriissalluni.
