- Nuannissaaq. Takornarialerisummi amerlanersaat aningaasameernikuupput, Arne Niemann KNR-mut oqarpoq.Assi: Camilla Hey - Visit Greenland

Aasaq manna umiarsuakkut takornartut 20.000-it Ilulissiassangatinneqartut

Umiarsuarnut takornariartaatinut ilaasut, Ilulissat inuisa sisamariaataat, aasaq manna Ilulissanut tikissapput. Taakkua qilanaarineqartut, sammisassaaleqissanngitsullu takornariartitsinermi siunnersuisoqatigiit siulittaasuat oqarpoq.

Umiarsuit takornariartaatit 62-it ukioq manan  Ilulissanut akunnissaput. Tamanna Visit Greenlandip nittartakkamini nalunaarsorsimavaa. Tassani inuit Ilulissanut maannamut 20.692-it tikittarumaartut naatsorsuutaavoq.

Paasissutissat amerlassutsinut tunngasut nutartertuarmata umiarsuit talinniartut, inuillu takornariat aasap ingerlanerani amerlanerulerataannaapput.

Ilulissani takornariaqartitsinermi siunnersuisoqatigiit siulittaasuat tikittussanut qilanaarpoq.

- Nuannissaaq. Takornarialerisummi amerlanersaat aningaasameernikuupput, Arne Niemann KNR-mut oqarpoq.

Umiarsuit takornariartaatit nunatta imartaaniinnissaat corona virusip tuniluunnera peqqutaalluni Namminersorlutik Oqartussat ukiuni kingullerni marlunni killilersorpaat.

Killilersuutaarupporli. Iluliarmiut juulip 20-ani takornarianik illoqarfimmi angalaartunik takusassaaleqissanngillat. Takornariammi 2550-it umiarsuarsuarmut MSC Poesia-mut ilaallutik illoqarfimmiinnisaat pilersaarutaavoq.

Taakkua Ilulissani najugallit affaraat. Qanoq sullinneqarnissaat siunnersuisoqatigiit suli pilersaarusiunngilaat. Siunnersuisoqartigiilli siulittaasuata oqarnera naapertorlugu taakkua sammisassaaleqissanngillat.

- Timmisartumik, Airzafarimik takornariarsinnaapput. Agguataaqqassapput. Ilaat illoqarfimmiissinnaapput, ilaat Kangiata Illorsuani allallu Ilulissat Kangerluani. Maani sumiiffissarpassuaqarluni sammisassarpassuaqarpoq.

Siunnersuisoqatigiit Avannaata Kommuniata ataaniipput. Taakkua tallimanik ilaasortaqarput. Ilaat neriniartarfinneerlutik ilaalli assersuutigalugu takornarianik imaatigut angallassisartuninngaanneerput.

Umiarsuarnik takornariartaatinik takornarialerisartut ataasiakkaat coronap tuniluunnerani akiliisinnaajunnaarsimapput. Nutaanilli aamma aallartittoqarsimasoq, Arne Niemann oqarpoq.

Umiarsuarnut takornariartaatinut ukioq manna ilaallutik Ilulissaniittussat nunatsinni amerlanerpaanngillat. Umiarsuit takornariartaatit 52-it nuummut talinissaat pilersaarutaavoq. Taakkualu 34.000-nit ikinnerunngitsunik ilaasoqassapput.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl