Aasaanerani timersorneq 2012-mi timersuutit nutaartaqassapput
Kommuneqarfik Sermersuumi meeqqat aasaanerani timersuutit basketball, talerminneq aamma Inuit Games misilissinnaavaat Aasaanerani timersorneq juunip naanerani ingerlanneqalerpat.
- Ukiormanna aalajangersimavugut timersuutit ilisimaneqarnerusut arsaanneq aamma assammik arsarneq pinngikkallarniarlugit. Assut qilanaaraarput Inuit Games ukiorpassuarni Nunatsinni ingerlanneqarsimasoq. Unammeriaatsit two-foot high kick, kneel jump, Alaskan high kick, airplane, pakassumminneq, qiterlerminneq, eqitarneq, one hand reach, head pull aamma one foot high kick misilinneqarsinnaassapput, Nick Lyberth Berthelsen Kommuneqarfik Sermersuumi meeqqat aasamut misilissinnaasaat pillugit oqarpoq.
Aasaanerani timersorneq aallartippoq meeqqat aasaaneranni Nuuk qimallugu angalanissamut periarfissaqanngitsut sammisaqarnissamut periarfissinniarlugit, tamatumali kingorna anguniakkat annertusisimapput. Taassuma saniatigut atuarfiit siusissukkut atuartuutiminnut nalunaarfissanik agguaasimapput taamaasillutik angajoqqaat ilisimaniassammassuk atuanngiffimmi meeqqat sulerisinnaanersut.
- Aasaanerani timersorneq atorlugu peqatigiiffiit neqeroorutaannik meeqqat takutitsiffigisarpagut aamma qularutissaanngilaq ataavartumik timersornissamut periarfissat takugaangamikkit timertalersartut. Meeqqat ilaannannguiluunniit illoqarfimmi peqatigiiffinnut ilaasortanngornissaannut aqqutissiussinnaagutsigit taava pitsaasumik angusaqarsimassaagut, Nick Lyberth Berthelsen oqarpoq, ilimasunnerarporlu Nuummi illorsuarmi timersortafimmi pisussat soqutigineqarluarumaartut
Inuussutissarsiortut Aasaanerani timersorneq tapersersorluarpaat. Aningaasaliinerit aqqutigalugit Kommuneqarfik Sermersooq periarfissaqalersimavoq peqataasut atisassaannik imerfissaannik, ullup qeqqasiornissaannik aammalu naatitanik pissaqartinnissaannut peqataanermi 50 koruuniinnarmik akiliisillugit.
- Ukiormanna pisussat immaqa aatsaat taama pilersaarusiorluagaatigaat. Aningaasaleerusuttut iluaqutigalugit peqataasut illup iluani kaminnik atorlutik takkuttut tikilluaqqusinnaalersimavagut, aggertigatillu sinilluareerlutillu nerilluarsimasassapput. Taamaasiornikkut Aasaanerani timersornermi pissarsiassaat annertunerussaaq. Tamaviaarnalaarsinnaavummi, kikkulli tamarmik peqataaffigisinnaasaannik sakkortussuseqarumaarpoq, Nick Lyberth Berthelsen oqarpoq, assullu talerminnerit aallartinnissaat qilanaarinerarlugu timersuut taanna ukiut kingulliit Sverige-mi, Tysklandimi, USA-mi Canadamilu ilisimaneqarlualermat.
Kingusinnerpaamik nalunaarfissaq tassaavoq juunip 15-at.