Aasaanerani sila arlalinnik rekordiliiffiusoq

Nunatsinni ukioq manna aasaanerani sila pillugu kisitsisit, Danmarkimi silasiortut DMI-meersut qimerlualaarunikkit nunatsinni aasaanera agguaqatigiissillugu nalinginnaasuusimasoq takusinnaassavaat.
Seqernup pukkililernerani Assi © : Siiva Thørring/KNR
Allattoq Karsten Sommer
septembarip 28-at 2017 07:02
Nutserisoq Mads Lynge

Kisitsisit nunatta immikkoortuinut ataasiakkaanut tunngasut silasiortut qimerlualaarunikkit takusinnaassavaat assigiinngitsutigut rekordiliisoqartarsimasoq, nalinginnaasumiillu sila allaanerusarsimalluni. Paasissutissat 1981-imit 2010-p tungaanut katersorneqarsimasut aallaavigalugit silasiortoq DMI-meersoq John Cappelen DMI-p nittartagaani taama oqarpoq.

Nuuk assersuutigissagaanni pisarnermit tamaani kiannerulaarsimavoq. Aasaanerani nalinginnaasumik kiassuseriartagaanit agguaqatigiissillugu 0,2 gradimik kiannerusimavoq.

Sinerissamilu sumiiffinni assigiinngitsuni, pingaartumik avannamut kippasissortaani avannaanilu pisarnermit sialoqarnerusimavoq.

AAMMA ATUARUK Aggustip qaammataa sialussiorfiusoq

Pituffimmi aggustip qaammataani siallertarnera 1961-imili uuttortarneqartalerpoq, 1975-imilu aatsaat taama siallertigimmalli ukioq manna taama aamma siallertigaaq.

Qeqertarsuulli Tunuata nalaani pisarnermit siallerpallaarsimanngilaq, pinngortitamilu nunap ukioq manna ikuallattarnerinut tamanna pissutaaqataasarsimalluni.

Danmarkshavnimi 1949-mili aggustimi aatsaat sialoqanngitsigaaq, Ittoqqortoormiinilu 1950-imi aggustimili aatsaat taama aamma sialoqanngitsigaluni.

AAMMA ATUARUK Sermersuarmi juulimi kiannerpaaffiusoq nillernerpaaffiusorlu qaangerneqartut

Sermersuup qiterpasissuani Summitimi juulimi marlunnik aamma rekordiliisoqarpoq. Tassani aatsaat taama issitsigalunilu aatsaat taama kiatsigaaq.

Juulip ulluisa sisamaanni minus 33 gradinik issippoq, juulilllu 28-anni 0 gradi qummut qaangilaarsimallugu, tassami 1,9 gradinik kiakkami. Summitimi taakku rekordiusut DMI-p allaaseraa.