Aasaanerani Narsami meeqqanut sammisassaqartitsineq
Aasami meeqqanut sammisassaqartitsineq Narsaq kommuneqarallarmalli aaqqissuunneqartarpoq. Ukioq manna kingumut taama sammisaqartitsinissami Kommune Kujallermi pitsaaliuinermik suliaqartut illoqarfiullu katersugaasiviata suleqatigiinnerasigut aaqqissuunneqarpoq.
Ataasinngornermiillu sapaammut aaqqissuinermi pisussat nalunaqutaq ataatsiniit sisamap tungaanut pisassapput.
-Aasaq manna meeqqat illoqarfitsik qimallugu aallartussaanngitsut sammisassaqartinniarlugit taama aaqqissuussivugut. Akeqanngitsumik meeqqat sammisassaqartsinneqassapput, aaqqissussinitsinnilu meeqqat qulit piumassutsiminik ikiuuttussat ikiortigissavagut. Tamanna pingaaruteqarluinnarpoq, taamaalillutami meerartatsinnut ilinniatitsisutigisinnaavarput nammineq piumassutsimik suliaqarneq inoqarfinni minnerusuni pingaaruteqarluinnartoq, Kommune Kujallermi pitsaaliuinermi siunnersorti Bolethe Stenskov oqaluttuarpoq.
Ukioq maanna sammisassaqartitsinermi qulequtarineqassaaq ”Qajuutaq”. Qajuutaq piniartorsuusimavoq, sammisassaqartitsinermilu pingaartinneqarpoq meeqqat siuaasamik qanga inuunerannik ilikkagaqarnissaat.
-Taammatut aaqqissuinermi meerarpassuit peqataasarput, neriunarporlu ukioq manna aamma taamaassasoq. Kinguaariit nikittarneranni nunatsinni allanngoriartortoqarsimaqaaq, ineriartornermilu siuaasatta qanoq inooriaaseqarsimanerannik ilisimasat meerartatsinnut ingerlateqqikkusuppagut. Taassumali saniatigut aasaq manna meeqqanut sammisaqartitsinissatsinni allanik aamma pisussarpassuaqarpoq, Bolethe Stenskov naggasiivoq.
Programmi:
Ataasinngorneq 02.07.12
Aasami sammisaqartitsinissamik ammaaneq kaffeqarlunilu theqassaaq. Piumasullu kiinnamikkut qalipatsissinnaapput.
Marlunngorneq 03.07.12
”Qajuutaq” kinaana? Qajuutaq pillugu paasititsiniaaneq
Pingasunngorneq 04.07.12
Puisip neqaanik igaasarneq, piumasunullu kiinakkut qalipatsinneq
Sisamanngorneq 05.07.12
Uumasunik piniagaqarnermik sammisaqarneq, meeqqat uumasut piniakkat titartarnissaannut periarfissaqassapput.
Tallimanngorneq 06.07.12
Pikunik tuniniaaneq, kikkulluunniit peqataaffigisinnaasaat.
Arfininngorneq 07.07.12
Nugaarsummut pisuttuarneq, Qajuutap najugarisimasaanik takutitsineq. Aalisarlunilu pisaqaqqaanniunneq.
Sapaat 08.07.12
Naggasiineq. Tamanut kaffeqarlunilu Theqassaaq, kinakkullu qalipatsittoqarsinnaajumaarpoq.
