AAS: Naalagaaffeqatigiinneq nutaaq pisariaqarpoq

Kalaallit Nunaat Saavalimmiullu Danmarkimut nutaamik isumaqatigissusiorusupput. Namminersornerullutik oqartussaaffiit naalagaaffimmut maannakkutut peqqinnanngitsumik attaveqarnerannut taarsiullugu suleqatigiinnermik ataqqeqatigiiffiunerusumik nassaartoqartariaqartoq Atlantikup Avannaani Suleqatigiit (AAS) isumaqarput.

Naalagaaffiup aappaagumut aningaasanut inatsisissaata ullumi pingajussaaneerneqarnerani nunatsinniit kissaatigisat arlaannaalluunniit ilalerneqanngillat. Naalagaaffiup sipaarniarfiginiagai assigiinngitsut pingasut pinngitsoorteriaraluarnerat nunatsinniit ilaasortat iluatsinngitsoorpaat. Siunnersuutigigaluarpaat issittumi ilisimatusarfik internetikkoortoq tapiiffigineqassasow, silasiorfiit sipaarniarfigineqassanngitsut, Pituffimmilu eqqaavit salinneqarnissaat aningaasaliiffigineqassasoq.

Atlantikup Avannaani Suleqatigiit ataatsimoorlutik oqaaseriumasaat Lars-Emil Johansenimit saqqummiunneqarput. Nunatsinniit Savalimiuniillu ilaasortat taarsiullugu naalakkersuisunik kaammattuipput inuianni naminersornerulersimasuni akisussaaneq tulluusimaarutissaqarnerlu siuarsaqqullugit.

Naalagaaffeqatigiinneq Lars-Emil Johansenip assersuuppaa imerajuttup imigassamik pinngitsuuisinnaannginneratut. Nunatta Savalimmiullu naalagaaffimmit aningaasalersorneqarnerat peqqinnanngitsuunerarlugu ima oqarpoq:

- Katsorsaatissamik nassaartariaqarpugut, taamaalilluta nammineersinaassuseq, ataqqinassuseq usorsisimaarsinnaanerlu pinngitsuuisinnaajunnaarnerup suujunnaarsissimasai nassaareqqikumallugit, Lars-Emil Johansen oqarpoq,

Atlantikup Avannaani Suleqatigiit aamma tikkuarpaat qanittukkut nalunaarusiarititartik nunatta naalagaaffeqatigiinnermut ilanngutsinneqarneranut tunngatillugu danskit salliuutaannik, oqaatiginngitsuugaannik allamullu sangutitsinerannik qulaajaasoq.

-Oqaluttuarisaanermi kukkussutaasarsimasut uniffiginagit suleqatigiiffiusinnaasut allat qilersuinnginnerusut ujartortariaqarput, Lars-Emil Johansen erseqqissaavoq. Siunnersuutigaa naalagaaffeqatigiinneq allatut aaqqissuunneqassasoq, soorlu nunat namminerisaminnik tunngaviusunik inatsisillit suleqatigiinnissamik isumaqatigiissutaannik pilersitsinikkut. Tamanna qanoq ililluni anguneqarsinnaanersoq danskit kalaallillu namminersornermut ataatsimiititaliaata qanittukkut suleqatigiiffiliaani siunnersuusiorfigineqassasoq Lars-Emil Johnasenip oqaatigaa.

Naalagaaffeqatigiinnerli tamanna utaqqinngikaluarlugu siuarsarneqarsinnaasoq Atlantikup Avannaani Suleqatigit isumaqarput. Siullermik kalaallit qallunaallu imminnut attaveqatigiinnerulerniassammata nunatta Danmarkillu akornanni angalaneq affaanarmik akeqalertariaqarpoq. Aappaassaanik siunnersuutigaat nunatsinni marlunnik efterskoliliortoqassasoq inuusuttut kalaallit qallunaallu atuarfissaannik.

-Inuusuttuunermi ikinngutigiinneq soraajuitsoq pilersinneqartarpoq, inuusuttuaqqallu akornanni pilersitat nuannersut siunissami suleqatigiinnissamut nukissaapput pitsaasut, Lars-Emil Johansen oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat