Aarsaartartut Nunatsinni pissartanngorniuttalissagunarput

Nunatsinni aarsaartartut peqatigiiffiisa aappaanni Maximum Paraglider Sportklubimi siulittaasup tullia Radioaviisip oqaloqatigisimavaa:

- Aarsaartarpunga nuannarilernikooqigakku, uerisoorfigilernikuullugu. Aarsaartaleramali alla eqqarsaatigisinnaajunnaarnikuuara, Erik Palo Jacobsen, aarsaarnermik nuannarisalik oqarpoq.

Taassuma aarsaartarneq nuannaringaaramiuk, Nunatsinni aarsaartartut siullerpaamik naapeqatigiinnissaat aaqqissueqataaffigaa, Nuullu Kangerluani Qooqquni tamanna pissalluni:

- Nunatsinni aarsaartartut naapeqatigiinnissaat aaqqissuupparput, aallaqqaammulli nuannariinnarlugu. Naapeqatigiissaguttalu aarsaarfissaqqissumi naapinnissarput siunniupparput, tassalu Nuup Kangerluani Qooqquni tamanna pissalluni. Illuaqqat atorsinnaassavavut, Nuullu Kangerluani anori aasakkut aarsaarfigissallugu iluaqaaq, pingaartumik ualikkut, Erik Palo Jacobsen, Nuummi aarsaartartut klubbit marluusut aappaanni Maximum Paraglider Sportklubimi siulittaasup tullia oqarpoq.

Klubbip aappaa tassaavoq Nuuk Paragliders.

Aarsaartartut allaneersut aasaru peqataanissaat, taassuma neriuutigaa. Nunatsinni aarsaartarnerup nuannarineqaleraluttuinnarnera eqqarsaatigalugu, Nunatta nunanut allanut unammisartunik aarsaartartoqalernissaa periarfissaasoraa:

- Nunani allani unammeqataasarpugut, Danmarkillu ataani inissisimasarluta. Tamanna immini ajunngilaq, Kalaallit Nunaatali ataani inissisimasutut unammisarsinnaanissarput ujartorparput, tamannalu pissutigalugu kattuffinngorsinnaanissarput suliniutigalutigu, Erik Palo Jacobsen, Maximum Paraglider Sportklubimeersoq, oqarpoq.

Sukisaarsatigalugu timmisartortartunik taanna aamma ujartuivoq, tassa kattuffiliorsinnaanissaq matumani eqqarsaataalluni.