Aarsaartartoq aningaasaliiffigineqalersoq

Aarsaartartut, tassa paraglidertertartut ilaat ataaseq Team Greenlandimiit aningaasalersorneqalerpoq.

Aningaasatigut tapersersorneqalersoq tassaavoq 38-nik ukiulik Max Petersen.

Ukiut arfinillit matuma siornatigut Max Petersenip aarsaarneq misileqqaarpaa.

Nunatsinni aarsaartartut ikittuinnaapput. Max Petersen oqarpoq Nuummi aarsaartartut 15-it missaanniittut.

Kujataani avannaanilu aarsaartartut amerlagisassaanngillat, Tunumilu ataatsimik aarsaartartoqarluni.

Aarsaarnermik pissartanngorniuttoqaraangat timersuutigisat marluusarput, tassa isorartussusermik silaannarmilu pinnguarsinnaanermik unammisoqartarmat. Silaannarmi pinnguarneq aerobatikkimik taaneqartarpoq.

Isorartuumik ingerlaarluni unamminermi isorartussutsit assigiinneq ajorput, sila apeqqutaasarmat. Sila ajunngikkaangat 110 kilometerit unammissutigineqartarput, kiisalu 50 kilometerit unammissutigineqartarlutik.

Max Petersenip unammissutigissallugu nuannarinerpaasaa tassaavoq isorartuumik ingerlaarneq.

Aarsaartartoq taanna ukiumut 20.000 koruuninik tapersersorneqartassaaq, aningaasallu angalanissamut billetsinut biilinillu attartornissamut aningaasartuutinut matussusiisassapput.