Aarrit tuusintit nunamiittut
Issittumi ukiuni kingullerni kianneruleriartorneratigut aarrit amerligaluttuinnartut nalinginnaasumik najortagaanni siku saappallaalersimmammat, nunaqarfiup Point Layip Inuppiatut Kalimik taaguuteqartup sineriaanut pisalersimapput.
Aarrit nunaqarfiup Kalip eqqaanukartarnerat inunnut alapernaallutik alutorsartunut ulorianartorsiortitsipput.
Aarrit 35.000-it nunaqarfiup Kalip, Alaskap avannaata kitaata sineriaata sissaanut siorna qaqipput, tassani inuppassuarnit alutorineqarlutik takuniarneqarput.
Aarrit 1.000-it sissamut qaqisimasut tallimanngormat takuneqarput, nutaarsiassaqartitsivik AP allaaserisaqarpoq.
Tamanna pissutigalugu nunaqarfimmi Kalimi aqutsisut aarrinik alapernaaserlutik qanillattortunut kaammatuuteqarput aarrit eqqissimatinneqarlutillu qanillattorneqassanngitsut.
Nunaqarfimmi Kalimi innuttaasut aavernik piniarnermik inuussutissarsiuteqarput pinngitsoorsinnaanagillu, taamaattummik inuppassuit aarrinik alapernaaserlutik aggertartut aarrit qimaatissagaat ernummatigineqarpoq, qimaanerminillu aarrit mikinerusut piaqqallu nanertillutik toqutaanerannik kinguneqarsinnaasoq, Andrea Medeiros amerikami pinngortitaq pillugu aqutsisoqarfimmeersoq AP-mut oqarpoq.
