Aarrit tuugaavi qallunaatsiaat peerunnerat pillugu paasissutissanik pissarsiffigineqartut

Niuernerullu tamatuma isasoorutigineqarnera qallunaatsiaat 1400-kkunni nunatsinniikkunnaarnerannut pissutaaratarsinnaavoq. Associated Press taama allaaserisaqarpoq.

Ilisimatusartut norgemeersut tuluit nunaanneersullu Europami katersugaasiviit alakkartersimavaat aarrit  saarngi Europami ukiut akulliit nalaanneersut DNA atorlugu misissugaralugit.

Ilisimatusarnermilu angusat ilisimatuussutsikkut atuagassiami Proceedings of the Royal Society B-mi saqqummiunneqartut naapertorlugit, aarrit saarngi 1100-kkut kingornaneersut amerlanerpaartaat nunatsinneersuupput.

- Aarrit tuugaavi ukiut akulliit nalaanni Europap kitaanut tikiunneqartut tamarluinnangajammik Kalaallit Nunaanneersimasinnaapput, misissuinermi peqataasoq, Bastiaan Star, Associated Pressimut oqarpoq.

AAMMA ATUARUK Qallunaatsiaat aarrit tuugaavi pillugit Nunatsinnut nunassissimasut

Aarrillu tuugaavi qallunaatsiaat inuuniarnerannut toqqammaviusimassappata niuerutigineqarnerallu isasoorutigineqarluni, taava tamanna qallunaatsiaanut kingunerlutsitserujussuarsimasinnaavoq.

Qallunaatsiaammi nunatsinnit qimagunnerat sioqqutilaarlugu Europami nappaalasoqarpoq tamatumalu peqatigisaanik sila aamma nillernerulersimalluni.

Taamaattoqarneratalu pissutigisaanik aarrit tuugaavi piumaneqarpallaarunnaarsimapput, misissueqataasoq alla, James Berret, University of Cambridgemeersoq Associated Pressimut oqarpoq.