Aarrit tuugaavi avammut tunisaajunnaarallarput

Aarrit tuugaavinik sanaat nunatsinneersut nunanut EU-mut ilaasortaasunut eqquteqqusaajunnaarallarput. Ilisimatusarnikkullu naliliisartoqatigiit tamanna aatsaat septembarip ulluisa 26-ianni iluamik aalajangiivigissagaat oqaatigineqarpoq.

Taama eqqusseqqusiunnaartoqarpoq, ilisimatuussutsikkut nalilersuinerit tunngavigalugit Tuluit Nunaanniit tamanna piumasarineqarmat.

CITES-ip allattugaateqarfiani uumasut nungutaalersorisat akornanni aarrit aamma ilanngullutik allattugaatigineqarput.

Taamaattumillu aarrit saarnginik sanaanik pisisoqassatillugu akuersissummik peqqaartoqartarpoq.

Tassalu imaappoq; takornariat pisissagunik immikkut akuersissummik peqqaartariaqartarput.

Tamannalu ukiuni kingullerni atugaaleriartortoq CITES pillugu pisortaqarfimmeersoq Ellen Sofie Chemnitz oqarpoq.

- 2003-mi aarrit tuugaavineersunit sanaat 560-t takornarianut tunineqarput. 2004-mi 750-t, Ellen Sofie Chemnitz oqarpoq.

2005-mi naatsorsuutit suli naammassilluarsimanngillat, maannamulli 960-t akuersissutigineqarsimallutik.

Qaffariaat peqquteqarpoq sinerissami tunitsiviusinnaasutut pisortaqarfimmiit akuerineqarsimasut arlaqalersimanerat.