Aarrit qulit sumiissusersiutilerneqarput

apriilip 10-at 2007 05:29

Aarrit qulit nunatta imartaaniittut sumiissusersiummik GPS-imik atortulerneqarsimapput. Taamaaliornikkut paasiniarneqarpoq aarrit aasakkut sumunnartarnersut.

Aarrit maanna sikorsuarniipput upernaarsiorlutillu. Aarrit sikup aakkiartornera ilutigalugu avannamut ingerlaartarput – sumulli ingerlaartarnersut, aasakkullu sumiittarnersut, ilisimaneqanngilaq, nutaarsiassaqartitsisvik BBC allappoq.

Aarrit aasakkut sumiittarnersut paasiniarlugu, aarrit nunatta sineriaata imartaaniittut qulit sumiissusersiummik GPS-imik ilisimatuut atortulersimavaat. Ilisimatuussutsikkut suliaq, Pinngortitaleriffimmit aammalu Issittuni pissutsinik ilisimatusarfimmit, tassa Dansk Polarcenterimit, aallartinneqarpoq, aqutsisuulluni professor Erik Bron.

Nunani issittuni pinngortitami atuinissami, aavernut sunniutigiumaagassat ilisimatuussutsikkut sulinermi paasiniarneqarpoq. Kalaallit nunaata sineriaata imartaani aarrit amerlassussaat Canadap imartaaniittunut attuumassuteqarnersoq ilisimatuussutsikkut sulinermi paasiniarneqartut ilagaat.

Aarrit qulit sumiissusersiummik atortulerneqarsimasut, BBC-p qarasaasiakkut nittartagaatigut malinnaavigineqarsinnaajumaarput.