Aarrit pillugit nalunaarusiaq uparuarneqaqqippoq

Aarrit naaleqqaarlugit pisarineqartalernissaanik Namminersornerullutik Oqartussat nalunaarusiaat sakkortuumik uparuarneqaqqippoq.

Tamatumuuna KNAPK-p siulittaasorisimasaa, Leif Fontaine, uparuaasuuvoq. Taassuma nalunaarut nutaaq sinnattuinnaasutut tissinaannartutullu taavaa.

Nalunaarusiami nutaami piumasarineqarpoq, aaveq, aallaaneqartinnani, naaleqqaarneqartassasoq. Piniariaaseq taanna kitaani piniartunut naleqqutinngilluinnarpoq, piniartut aaffanniartarnerat avataani pinngortitap pissusiinut naleqqussarnikuummat.

Kitaani piniartut aaffanniaraangata tamanna avataata sikuisa akorngini angallatit atorlugit ingerlanneqartarpoq. Aaveq sikup qaani qassimasoq mianersortumik orninneqartarpoq, toqullugulu aallaaqqaarneqartarpoq, avaarlugu qungasiarluguluunniit. Annaajumanngikkaannilu tamatuma kingorna aatsaat naalinneqartarpoq. Nalunaarusiaq malillugu Sisimiormiut killormut siunissami aaffanniartalissapput.

Taamaattoqassappat Sisimiut pigisaani aaffanniarneq ajornarluinartunngortussaasoq, Leif Fontaine allappoq. Sisimiormiullu mamarilluagartik aarrup neqaa qaqutigorsuaq siunissami aatsaat ussertalissavaat.

Leif Fontaine isumaqarpoq, sumiiffikkaartumi ilisimasat inatsisiliornermi atorneqarnerulernissaat, qitiusumik aqutsinermut tapertatut atorneqarlutik.