Aarrit nassitsissutilersorneqartut ilaat ataasiinnaq iluatsippoq
Aarrit-uku aasaanerani sumunnartartut? Apeqqut taanna akissutissarsiniarlugu ilisimatuut kitaani aavernik, apriilip qaammataani, nassitsissusiigaluarput, maannamulli ataasiinnaq iluatsissimavoq.
Aarriit arfineq-pingasut sumiissusersiummik GPS-imik tuugaavisigut ikkussiffigineqartut, ilaasa arfineq-marluk nassitsissutaat pissusissamissut nassiussuinngitsut, ilisimatusartut oqaatigigaat, tuluit nutaarsiassaqartitsiviat BBC allaaserinnippoq.
Ilisimatusaammik aqutsisoq Erik Born, oqarpoq nassitsissutit ilaat atorsinnaannginnerat sumik pissuteqartoq nalullugu, ilimagaali atortut sikup sinaavanut kallussaanneqartarnerminni katakkiartorsimassasut.
GPS-ikkut sumiissusersiut maanna malittarisinnaasatuaq, aarrup arnavissap qulit aqqaneq-marlullu akornannik ukioqassangatitap tuugaavini ikkusimasuuvoq. Nassitsissutillu malittarineqarnerani paasinarsivoq, arnaviaq sumiiffimmit sumiissusersiummik ikkussiffimmit suli nikissimanngitsoq.
- Neriuppunga nikinneri tamaasa suli malittarisinnaassallugit, Erik Born BBC-mut oqarpoq.