Aarrit allami uninngaartarfeqalerput
Uumasut nungutaannginnissaannut aningaasaateqarfik - WWF - naapertorlugu aarrit allamik katersuuttarfittaarsimanerat nunarsuatta kissakkiartorneranik pissuteqarpoq.
Aarrit ilaatigut oqimaassusersuartik pissutigalugu nalinginnaasumik uninngaarfigisartakkaminni sikup qanoq issutiginera apeqqutaatittarpaat nunarsuullu kissakkiartornerata siku saaliartortimmagu nunami, tassalu Siberiap issittortaata sineriaani, allanik uninngaarfissarsiortariaqalersimallutik.
- Aarrit ukiuni aggersuni Chukotkap sineriaani nunanut arlaqarnerusunut siaruaakkiartorumaartut naatsorsuutigisariaqarparput, WWF’ip Ruslandimi nunap immikkoortuini pilersaarusiornermut siulersortaasoq Viktor Nikiforov oqarpoq, taannalu isumaqarluni uumasunik eqqissisimatitsiviit aarrit piniapilunneqannginnissaannut uumaannarnissaannullu akornusersuutaasinnaasunut allanut illersuutaasinnaasut pilersinneqartariaqartut.
- Tamanna ukiuni makkunani pinngortitap allanngoriartornerani, aarrit uumaannarnissaannut ikiorniarlugit ataatsimoorluta akisussaaffigisariaqarparput, Viktor Nikiforov ScienceDailymut oqarpoq.
