Soorluunna ajornarpasissanngikkaluartoq: Aarrinik ujaasiit nassaarigukkillu GPS-ikkut nassitsissutinik ikkussuiffigeriarlugit angerlariarlutit qarasaasiakkut ingerlaarffiat malittariuk.
Tamannali ajornaatsuinnaanngilaq, taama oqaluttuarpoq Pinngortitaleriffimmi aarrinut tunngatillugu ilisimasaqarluartoq; Erik Born,
BBC-miit apersorneqarluni.
Erik Born, ilisimatusarnikkut suliaqarnermi siuttuuvoq, aarrillu GPS-inik ikkussuiffiginerisigut paasiniartussaallugu aarrit aasakkut sumiittarnersut kiisalu piniarneqarnerminni uuliasiortoqarneratigullu imaani uumasuunerat qanoq arlaatigut sunniuteqarfigineqartiginersoq paasiniartussaallugu.
Aarrit arfineq pingasut apriilimi GPS-ilerneqarsimapput, sikumiittarneralli pissutaalluni arfinillit aserorsimallutik suli aarrit aasarsiorfissaminnut ingerlaalinngitsiartut. Aarrilli marluk soqutiginaatilimmik aqqumminnik nassiussuisimapput. Ingammik aarrup aappaata Qeqertaaluup kujataata´kitaanut ingerlaarnermini kilometerit 100-it arlallit atorsimavai.
Taamatut ilisimatusarnermi angusat annikikkaluartut, Erik Born naammagisimaarinnittorujussuuvoq, taamatut misiliineq misiliinerinnartut isiginngilaa.
- Iluatitsivallaannginneq piinnarlugu ingilluni isumalorusaassagaanni aamma puigortariaqanngilaq qanoq nuannertigisumik suliaqarneq, taama oqarpoq, Erik Born, BBC-kkunnit apersorneqarluni,
- Aamma eqqaamasariaqarpoq uumasut tamakku ajornanngitsuararsuarmik ingerlaarfii misissorneqarsinnaasuugaluarpata, qangarsuarli aarrit ingerlaarfii paasineqareersimassagaluarmata.
Taama oqarpoq; Erik Born. BBC-mit apersorneqarluni.