Aarluk toqunartunik akoqarnerpaanngortoq
Aarluk issittumi mingutsinneqarnerpaalersimasoq, Norgemiut ilisimatusaatigalugu misissuinerisa takutippaat.
Aarluit aasaanerani Barentip Svalbardillu imartaaniittartut ukiuunerani kangerluk Tysfjordi neriniarfittut najortarpaat. Kangerlussuarmi tassani aarluit orsui peersiffigalugit misissuiffigineqarput, siullermik 2002-mi tullianillu 2005-imi.
Paasineqarpoq avatangiisit mingutsinneqarnerisigut aarluup timaa akoorutissanit toqunartortalinnit navianartorsiortitaasoq.
Mingutsitsisut ajornerit aarluit timaanut sunniutigisinnaasaat ilisimatuunit ernummatigineqarput. Uumasormi toqunartumik akoqarpallaalersoq qaratsamigut akornuserneqartarpoq, pissusilersornermigut aamma kinguaassiorsinnaanermigut innarlerneqartarluni.
Misissuinerit aamma takutippaat imartaq najugannagaat mingutsinneqangaatsiarsimasoq.
Aarluk arferit kingutillit angisuut ilaat seks ton angullugu oqimaatsigilersinnaavoq imavinnilu arlalinni uumasuulluni, Aarlunnik mississuinermik aallaaserinnippoq Polarfronten.
