Assi: jmiguel rodriguez/Flickr Creative Commons

Aarluit pisarineqarnerat Nuummi takornarialerisut ugguutigigaat

Sapaatip akunnera. Aarluit pisarineqannginnerminni Nuup Kangerluani taama sivisutigisumik uumasinnaatitaapput.

Aarlunnik Nuup Kangerluaniittoqartarnera qaqutigoortuuvoq.

Nuuk Water Taxi aarluit ataatsimoortut ikittunnguit tallimanngormat qanillimmagit alutorsartoqangaatsiarpoq.

Arlerit alutornartut takunissaannut soqutiginnittoqangaarmat Nuummi takornarialerisut kangerlummut arfernik nuannarisaqartut isiginnaarsinnaasinniarluni angallassinissaannut inissat ulluni kingullerni ulikkaaqqapput. Maannali alutorsartoqarsinnaajunnaarpoq.

Inoqutinut attaveqaatit naapertorlugu arferit tamarmik sisamaasut toqunneqarput.

Aarluit sooq toqunneqarpat?

Aarluit sisamat sisamanngornermi pisarineqarsimasut Facebookikkut atuarneqarsinnaavoq. Taakkunannga pingasut kivipput, ataaserlu nunamut apuunneqarpoq. Aarluup neqaa mattaalu nittartakkakkut Wildfood.gl-ikkut 50 koruunilerlugit maanna pisiarineqarsinnaapput.

Nuummi takornarialerisut aarluit sooq toqunneqarsimanerat paasisinnaavallaanngilaat.

- Pisariaqanngitsoq eqqarsarpunga. Ullumikkut angalassinissatsinnut ulikkaaqqasussaagaluarpugut, taannali taamaatiinnarneqarpoq, Nuuk Water Taxip pisortaa, Anders Lykke Laursen oqarpoq.

Taanna Greenland Cruisesip piginnittuanik Ivik Knudsen Ostermannimik taperserneqarpoq.

- Uggornartorujussuusoraara. Aarluit takusarnissaannut angalassinissaq arlallit ulikkaaqqagaluarput.

Aarluit puisinut arfernullu allanut kangerlummiittunut ersititsisut, tamannalu piniartut pisariaqartitaminnik piniarniarnerannut ajornakusoortitsisoq arlallit oqaatigaat.

Ivik Knudsen Ostermannilli puisit ersitillugit qimaatinneqarsimasorinngilai.

- Ullut tamaasa angalasarnitsinni puisinik suli takusarpugut, taamaammat ersitillugit qimaatinneqanngillat. Immaqa ilaat, tamarmiunngitsulli.

Taassuma Kalaallit Nunaanni Nerisaqarnermut Timigissarnermullu Siunnersuisoqatigiit aarluit avatangiisinut toqunartumik PCB-mik kviksølvimillu mingutsinneqangaatsiarsimanerat pissutigalugu nerineqannginnissaannik innersuussuteqarnerat aamma erseqqissaatigaa.

- Neqip nerineqaqqusaannginnera pissutigalugu piniarnissaannut pissutissaqanngilaq, Ivik Knudsen Ostermann oqarpoq.

Anders Lykke Laursenip Ivik Knudsen Ostermannillu piniartut piniarsinnaatitaanerat ataqqillugu erseqqissaatigaat:

- Kangerlummi Savalimmiutulli angitigivoq, taamaammat tamanut inissaqartitsisoqassagaluarpoq, Anders Lykke Laursen oqarpoq.

Pisumili uani aarluit uumatiinnarneqarnissaat pitsaanerussasorigaluarpaat.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl