Aarluit Issittumi timimikkut toqunartoqarnerpaapput
Issittumi misissuinerit kingulliit paasinarsisippaat aarluit mingutsitsinerup kingunerisaanik timimikkut toqunartoqarnerpaalersimasut, siornagut nannut toqunartoqarnerpaatut nalilerneqartaraluarput.
Ilisimatuut Norgemeersut misissuereerlutik tupaallaatigaat issittumi aarluit timiminni toqunartoqarnerpaanngorsimanerat. Norgemi Issittumi Ilisimatusarfiup ingerlataanik Norgep avannaani Tysfjordemi aarluit orsuinik peersillutik misissuinerminni akoorutissat sinnikuinik toqunartulinnik aarluit annertuumik timermioqalersimaneri tupaallaatigeqaat.
Ilisimaneqareerpoq uumasut nerisaqaqatigiinnerini arferit nannullu toqunartoqalernissamut qaninnerusut.
Uumasunik pinngortitamillu illersuisut
suliniaqatigiiffiata World Wildlife Foundationip nalunaarutigaa Issittoq tassaalersimasoq akoorutissat sinnikuinik eqqaavik. World Wildlife Foundation-ip EU-mi ministerit akunneq una naapittussat qinnuigai, issittumi pinngortitap illersornissaanut inatsisit sukateqqullugit.
WWF-ip annilaanngatigaa inatsisit sukannernerulersinneqanngippata suliffissuaatillit akoorutissanik toqunartuliortartut inatsisit imminerminnut iluaqutissanngorlugit naleqqussalissagaat.
