Aarluit ilisimatuut eqqissisimatitsivittaartinnialerpaat

Ilisimatuut Vancouver Islandip aamma USA-p avannamut kippasissuani St.Juanimi killeqarfinni ukiuni kingullerni misissuisimapput, aarluit suut nerissallugit pilerigineruneraat. Paasivaat kapisillit British Colombiami kuunniit sisoortartut, Chinookinik taaneqartartut, aarluit mamarisorujussuugaat, ilisimatuulli aamma isumaqarput tamaani aarluit nungutaaqqajaasut, tassamigooq 87-iinnanngorsimammata. Takornariarpassuit tamaanngartarput, ernummatigineqarporlu arferit immaqa annilaangasarlutillu ersisartut.

Taamaammat ilisimatuut isumaqarput aarlunnut "neriniartarfeqalertariaqartoq", eqqissillutik kapisilittorsinnaaniassammata. Imaani neriffissaannik 2 gange 12 kilometerinik neriffissalerniarpaat, eqqissisimatitaalluinnartussamik, angallatillu tamaanaqqussinnaatitaassanngillat. Neriuutigineqarpoq arferit qasuersersinnaassasut, eqqissillutik nerillutillu kinguaassiorsinnaassallutik.

Tamannali arfernuinnaq iluaqutaassanngilaq. Aamma ilisimatuut misissuilluarnerusinnaalissapput.

Siunnersuut akuerineqassappat, aarlunnut aatsaavissuaq taama aaqqissuussisoqassaaq.