Aarluit amerliartuinnarput
Sikuiuitsumi avannarlermi sikuerukkiartuinnarnera ilutigalugu aarluit amerligaluttuinnarput. Issittup imartaani ukiut arfinillit ingerlaneranni aarlunnik takunnittarnerit akulikilliartuinnarsimapput, Nunatsiaq Newsimi allaaserinnittoqarpoq.
Avannaarsuani aarluit amerliartuinnalerunik qilalukkanut arfernullu allanut nungusaatinngortussaapput, tassami aarluup ataatsip neqi 226 kilo missaanniittoq ullormut nunguttaraa ilisimaneqarmat.
Akilinermi Hudsonip Iterlassuani 1980-imiit 1990-imut arfinileriaannarluni aarlunnik takusoqarsimavoq ukiunilu arfinilinni kingullerni 30-riarluni aarlunnik takunnittoqartarsimasoq, Nunatsiaq Newsimi allaaserineqarpoq.
- Imaassinnaavoq aarluit nuttarnerat pissutaaqataasoq, aamma imaassinnaavoq Canadami iluanaarutigalugu 1970-imili arfanniartarunnaarsimaneq pissutaasimasoq, kisianni sikuerukkiartornera aarluit amerliartornerannut attuumassuteqarluinnarsoraarput, Manitobami ilisimatusarfimmeersoq Jeff Highton oqarpoq.
Akilinermi naggueqatigut Inuit piniartortaat ilisimatusarfinnit aamma paasiniaaffigineqarsimasut oqaluttuartarsimapput, aarluit amerliartornerat assut malunnartoq ernumanartorlu, tassami aarluit piniartut piniagaannik nerisaqartuummata.
Nunavummi Repulse Baymi 1940-kkut sioqqullugit aarlunnik takusoqartarsimanngisaannarpoq, massakkullu aasat tamarluinnaasa takunnittoqartalersimasoq, Canadap kangiani aarloqassutsimik misissuisoq Jeff Highton oqarpoq.
