Aarhus Festugemi kalaallit aliikkusersueqataapput

Kalaallit nipilersortartut, Small Time Giants, Aarhusimi najugallit, illoqannginnersami Klostertorvimi ippassaq unnukkut tusarnaartsitsipput.

Small Times Giant, nipilersoriaatsimik rockimik misigissuseqarpaluttunik nipilersortartutut taaneqarsinnaasut, aaqqissuussinermi "Kalaallit Nunaat Tivolimi" pingaarnertut nipilersortuupput.

Aarhusimi festugeqarnerani qulequtaritinneqarpoq kukkussutit ajunngitsunik kinguneqartarnerat, aamma naapinnerit nuannersut.

Nalliuttorsiualaartitsilluni aaqqissuusinermi Kalaallit Nunaannut tunngassuteqartunik allanik aamma peqataasoqarpoq. Atuakkanik nittarsaassisoqassaaq, aamma atuakkialerineq sammineqassalluni, tassani atuakkiortup Hans Jakob Helmsip atuakkiani "Arsarnernut Uinngiarsukkuit" nittarsaatissavaa,

Atuakkat pillugit ullumi aaqqissuussinermi meeqqanut atuakkiat saqqummersinneqarpata, meeqqanut atuakkiortut Lana Hansen aamma Bolatta Silis Høegh, nittarsaassissapput, aamma atuakkanik saqqummersitsisarfiit, Milik Publishing aamma Atuagkat saqqummersitaminnik nittarsaassissallutik.  

Aarhus Festuge naammassippat aaqqissuussinermi nipilersortuusut Kalaallit Nunaannut Islandimullu tusarnaartitsiartorlutik  angalassapput. Nipilersortartut tusarnaartitsillutik angalasussat tassaapput Howe Gelp aamma Mark Lanegan, minnerunngitsumillu nalunngilluagarput Nive Nielsen.

Aarhus Festugeqarnerani aaqqissuussisoq, Jens Folmer Jepsen, KNR-imut oqareerpoq, Aarhus Festugep aaqqissorneqarnerani  Kalaallit Nunaanni pisunik malinnaaqqissaarlutik, eqqumiitsuliornikkut kulturikkullu Kalaallit Nunaani ulluni makkunani pisut soqutiginarmata.

Siorna Aarhus Festugeqarmat Simon Lynge tusarnaartitsivoq.