Aaqqissuussinissamut isummersuutit nutaat

Ilisimatuut nunatsinneersut nunanilu avannarlerneersut katillutik 39-it Nuummi isumasioqatigiipput paasissutissanik nunatsinni kommuneqarfinnik aaqqissuusseqqinnissamut iluaqutaasinnaasunik saqqummiussuillutik. Kommuninik aaqqissuusseqqinnissamut atatillugu siunnersuuteqarnissaq isumasioqatigiissitsinermut siunertaasoq, aaqqissueqataasoq Roskildip ilisimatusarfiani professori Rasmus Ole Rasmussen oqarpoq:

- Isumasioqatigiinnermi Savalimmiunit, Islandimit, Norgemit, Sverigimit Danmarkimit Kalaallillu Nunaannit peqataasut misilittagaannik pissarsiarisat nalunaarusiatut isikkulerlugit, qinikkanillu isumassarsiorfigineqarsinnaasunngorlugit katersussavagut, neriuutigalugu Kalaallit Nunaanni kommuneqarfinnik aaqqissuusseqqinnissamut atorluarneqarsinnajumaartut, Rasmus Ole Rasmussen oqarpoq.

Nunani avannarlerni allani aaqqissuusseqqinnerni immikkoortortanillu ineriartortitsinerni ajornartorsiutit suut misilittagarineqarpat? Immikkoortortani inuussutissarsiornikkut ineriartortinermi suut eqqumaffiginiarneqartariaqarpat? Aaqqqissuusseqqinnerillu inuiaqatigiinnut sutigut kinguneqartarpat? Apeqqutit tamakkuupput isumasioqatigiinnermi sammineqartut Rasmus Ole Rasmussen erseqqissaavoq.

Isumasioqatigiinneq tallimanngormat aallartittoq ullumi naammassineqarpoq.